پاکستان اور کشمیر میں منائی جارہی ہے عید الفطر

پاکستان، کشمیر اور برصغیر کے دیگر ممالک میں گذشتہ شب شوال کا چاند نطر آیا، جس کے بعد عید الفطر جمعرات کو منانے کا اعلان کیا گیا۔ تاہم بھارت کے بیشتر حصوں میں 14 مئی کو عید منائی جائے گی۔

گذشتہ شب کشمیر کے مفتی اعظم ناصر الاسلام نے اعلان کیا کہ جمعرات کو جموں و کشمیر میں عید الفطر منائی جائے گی۔

مفتی اعظم نے ای ٹی وی بھارت کو فون پر بتایا کہ 'متعدد مقامات سے شوال کے چاند نظر آنے کی شہادتیں موصول ہوئی ہیں اور کمیٹی اس نتیجے پر پہنچی ہے کہ عید کل (جمعرات کو) منائی جائے گی۔'

انہوں نے کہا 'میں جموں و کشمیر کے عوام کو عید کے موقع پر مبارکباد پیش کرتا ہوں اور اللہ تعالی سے دعا کرتا ہوں کہ یہ موقع پورے جموں و کشمیر کے لئے امن و خوشحالی کی نوید بن کر آئے۔'

انہوں نے مزید کہا کہ 'ہم سب کو اللہ سبحانہ و تعالی سے دعا کرنی چاہئے کہ پورے عالم کو کورونا وائرس جیسی مہلک وبا سے نجات ملے۔'

اس سے قبل پاکستان مرکزی رویت ہلال کمیٹی کے طویل اجلاس کے بعد پریس کانفرنس کرتے ہوئے چیئرمین مولانا عبدالخبیر آزاد کا کہنا تھاکہ 'پاکستان بھر سے شہادتیں موصول ہوئیں اور بہت سے مقامات پر مطلع ابر آلود تھا'۔

پاکستان میں مرکزی رویت ہلال کمیٹی نے گھنٹوں غور و فکر کے بعد اعلان کیا تھا کہ 'ملک میں شوال کا چاند نظر آگیا ہے اور عید جمعرات کو منائی جائے گی'۔ ماہرین و مذہبی رہنماؤں نے عوام سے اپیل کی ہے کہ 'کورونا وائرس وبا کے پیش نظر ایس او پیز کا خیال رکھتے ہوئے گلے ملیں اور مصافحہ سے گریز کریں اور سماجی فاصلہ برقرار رکھیں۔