بی جے پی اس بار پچاس سے زائد سیٹیں جیتے گی، اشوک کول

سرینگر: جموں وکشمیر بھارتیہ پارٹی کے جنرل سیکریٹری (تنظیم) اشوک کول نے جمعرات کے روز کہا کہ آئندہ انتخابات میں حکومت بنانے کے لئے حکمت عملی تیار کی جارہی ہے۔ انہوں نے کہا کہ حکومت بنانے کے لئے علاقائی جماعتوں کی اگر ضرورت پڑتی ہے تو اتحاد کریں گے۔ ان باتوں کا اظہار موصوف نے سرینگر میں نامہ نگاروں سے بات چیت کے دوران کیا۔

انہوں نے کہا کہ اسمبلی انتخابات میں بی جے پی اس بار پچاس سے زائد سیٹیں جیتنے میں کامیاب ہو جائے گی۔ان کے مطابق بی جے پی کو جموں وکشمیر میں مزید مضبوط بنانے کی خاطر پارٹی نے بڑے پیمانے پر مہم شروع کی ہے۔

اشوک کول نے کہا کہ آنے والے اسمبلی انتخابات میں بی جے پی اپنے بل پر حکومت بنانے میں کامیاب ہو جائے گی اور اگر ضرورت پڑتی گی تو علاقائی جماعتوں کے ساتھ بھی اتحاد کریں گے۔انہوں نے کہا کہ دفعہ 370 کے حوالے سے عدالت عظمیٰ نے جو تاریخی فیصلہ سنایا ہے وہ سب کو تسلیم کرنا چاہئے۔اشوک کول نے کہا کہ بی جے پی چناؤ کے لئے پوری طرح سے تیار ہے۔

واضح رہے کہ جموں وکشمیر میں آخری اسمبلی انتخابات نو برس قبل یعنی 2014 میں ہوئے تھے۔ 19 جون 2018 کو ریاست میں اس وقت صدر راج نافذ کیا گیا جب بی جے پی نے پیپلز ڈیموکریٹک پارٹی کی صدر محبوبہ مفتی کی قیادت والی مخلوط حکومت سے علیحدگی اختیار کی اور اسمبلی میں اکثریت نہ ہونے کی صورت میں وزیر اعلی کو اپنے عہدے سے مستعفی ہونا پڑا اور اس وقت کے گورنر سیتہ پال ملک نے اسمبلی کو برخاست کردیا تھا۔

جموں وکشمیر میں اگرچہ صدر راج کو 5 برس سے بھی زائد کا عرصے سے ہوچکا ہے تاہم 1989 سے 1996 کے درمیان 6 برس کا طویل مدتی گورنر راج بھی یہاں نافذ رہا ہے۔ بتادیں کہ حال ہی میں سپریم کورٹ نے الیکشن کمشن آف انڈیا سے 30 ستمبر 2024 سے قبل جموں و کشمیر میں اسمبلی انتخابات منعقد کرانے کا حکم دیا ہے۔
(یو این آئی مشمولات)