راجستھان: انوپ گڑھ ضلع کے گھڈسانہ میں ایک شخص کو مرغی چوری کرنے کے الزام میں پیٹ پیٹ کر ہلاک کر دیا گیا۔ پولیس نے موقع پر پہنچ کر لاش کو اپنی تحویل میں لے لیا اور کل رات کو ہی سرکاری اسپتال کے مردہ خانہ میں رکھوا دیا۔ قتل کے مرکزی ملزم کو پولیس نے گرفتار کر لیا ہے جبکہ دو فرار ہو گئے ہیں۔گھڈسانہ تھانے کے ایس آئی یشپال سنگھ نے بتایا کہ یہ واقعہ گاؤں 13 ایم ڈی میں سامنے آیا، جہاں ملزم پھتو رام نے اپنے بھتیجے اور داماد کے ساتھ مل کر رام کشن باوری کا قتل کیا۔ ذرائع کے مطابق متوفی رام کشن، پھتو رام کے گھر سے تین مرغیاں لایا تھا، جس میں سے اس نے ایک کو مار ڈالا۔
جب پھتو رام کو اس بات کا علم ہوا تو وہ مشتعل ہو گیا اور رام کشن کو سبق سکھانے کا فیصلہ کیا، ایسے میں اس نے اپنے بھتیجے اور داماد کو اپنے منصوبے میں شامل کیا اور رام کشن کو درخت سے باندھ کر مارا پیٹا۔ لاٹھیوں سے اس کو اس طرح مارا گیا کہ وہ بے ہوش ہو گیا اور تھوڑی دیر بعد دم توڑ دیا۔
- نوجوان کے قتل معاملہ میں خاتون اور اس کا عاشق گرفتار
- مونو مانیسر کی گرفتاری پر ناصر کی اہلیہ کا رد عمل، مجرموں کے ساتھ بھی ایسا ہی سلوک ہو
گاؤں والوں نے اس واقعہ کی اطلاع پولیس کو دی، جس کے بعد پولیس نے موقع پر پہنچ کر لاش کو اپنی تحویل میں لے کر سرکاری اسپتال کے مردہ خانہ منتقل کر دیا۔ تفتیشی افسر نے بتایا کہ مرکزی ملزم کو پکڑ لیا گیا ہے جبکہ دیگر دو ملزمان کی گرفتاری کے لیے کئی مقامات پر چھاپے مارے جا رہے ہیں۔ پولیس آج لاش کا پوسٹ مارٹم کرے گی۔
