پولیس کی مبینہ مارپیٹ سے ہلاک دکاندار کی موت کا سچ کیا ہے؟

ریاست مہاراشٹر کے اورنگ آباد میں پولیس کی مبینہ مارپیٹ سے ہلاک دکاندار کی موت کا سچ سامنے آگیا ہے۔ سی سی ٹی وی کیمرہ میں مارپیٹ کا کوئی منظر قید نہیں ہوا ہے۔ سچ تو یہ ہے کہ دکاندار پولیس اہلکار سے بات کرتے ہوئے غش کھا کر گرپڑا جِس کے بعد اس کی موت ہوگئی۔ دکاندار کی پولیس سے کسی طرح کی کوئی مارپیٹ نہیں ہوئی تھی۔

پولیس کی مبینہ مارپیٹ سے ہلاک ہونے والے دکاندار کی موت کی سچائی اب سب کے سامنے آگئی ہے، عثمان پورہ میں دکاندار فیروز خان کی موت کو لیکر پورے شہر میں حالات کشیدہ ہوگئے۔

پولیس اسٹیشن کا گھیراؤ بھی کیا گیا۔ آخرکار رکن پارلیمان امتیاز جلیل کی مداخلت سے حالات قابو میں آئے۔

ہلاک شدہ نوجوان کے رشتہ داروں کا الزام تھا کہ پولیس سے جھڑپ میں فیروز کی موت ہوئی تاہم سی سی ٹی وی کیمرے میں صاف دکھائی دے رہا ہے کہ پولیس کے طلب کرنے پر دکاندار پولیس اہلکار سے ملا۔ اس کے قریب گیا دونوں کے درمیان کچھ بات چیت ہوئی لیکن کچھ دیر بعد ہی فیروز کا توازن بگڑ گیا اور وہ وہیں گر کر بے ہوش ہوگیا۔

اس پورے معاملے میں ابھی کرائم برانچ پولیس نے باضابطہ کوئی بیان جاری نہیں کیا ہے، کرائم برانچ پولیس معاملے کی جانچ میں مصروف ہے ۔