چرس اسمگلر رہائی کے بعد جیسے ہی اپنے علاقے میں پہنچا۔ تو اس کے دوستوں نے کورونا کے قوانین کو توڑتے ہوئے بینڈ باجا اور آتش بازی کرکے اس کا استقبال کیا۔
استقبال کا ویڈیو سوشل میڈیا پر وائرل ہونے کے بعد پولیس نے پندرہ لوگوں کے خلاف مقدمہ درج کیا ہے۔
پولیس سے ملی اطلاع کے مطابق 29 ستمبر کی صبح چار بجے اسمگلروں کو اورنگ آباد کی ودانت نگر پولیس نے پنچوتی چوک سے گرفتار کیا تھا ان کے پاس سے ایم ڈی ڈرگس کے 13 پیکٹ اور چرس کے 25 پیکٹ برآمد ہوئے تھے۔
ان ملزموں کی شناخت آصف علی موسیٰ قریشی (41) ، نورالدین بدرالدین سید (41) ، فیضان خان (34) اور اکبر ہاشمی (24) کے طور پر ہوئی تھی۔
ان سب ملزمین کو عدالت میں پیش کیا گیا تھا اور عدالت نے انہیں ہرسول جیل بھیجنے کا حکم دیا تھا۔ ان چار ملزمین میں سے ایک ملزم اکبر ہاشمی کو عدالت سے ضمانت مل گئی۔ جب وہ اپنے گھر آیا تو اس کے استقبال کے لیے اس کے دوست و احباب نے پھول کا ہار پہنا کر استقبال کیا اور بعد میں اسے کندھوں پر اٹھا کر اس ڈھول تاشے کی دھن پر ناچنے لگے۔
ایسا دکھائی دے رہا تھا کہ جیسے ملزم کوئی جنگ جیت کر واپس آگیا ہے۔اس دوران راستے پر ٹریفک جام ہوگئی۔ جیسے ہی یہ ویڈیو سوشل میڈیا پر وائرل ہوا۔ اورنگ آباد کے بیگم پور پولیس تھانے میں استقبال کرنے والے 15 افراد پر مقدمہ درج کیا گیا ہے۔
