Another Cheetah Dies at Kuno Park کونو نیشنل پارک میں ایک اور چیتے کی موت، گردن پر زخم کے نشان

بھوپال: مدھیہ پردیش کے کونو نیشنل پارک سے ایک اور افسوسناک خبر آئی ہے۔ پراجیکٹ چیتا کے تحت لائے گئے چیتوں میں سے ایک اور چیتے کی موت ہو گئی ہے۔ آج صبح تیجس نام کا یہ چیتا زخمی حالت میں پایا گیا۔ اطلاع ملتے ہی ڈاکٹروں کی ایک ٹیم موقعے پر پہنچ گئی لیکن جب تک اس کا موقعے پر معائنہ کیا گیا تب تک اس کی موت ہوچکی تھی۔ بتایا جا رہا ہے کہ چیتا تیجس کی گردن پر گہرے زخم پائے گئے ہیں۔ کونو میں اب تک تین بچوں سمیت سات چیتے مر چکے ہیں۔

حکام چیتوں کے آپسی جھگڑے کو وجہ بتا رہے ہیں

محکمہ جنگلات کے حکام نے ایک پریس ریلیز جاری کرتے ہوئے کہا کہ صبح 11 بجے کے قریب چیتاوں کی نگرانی کے لیے تعینات ٹیم کو نر چیتا تیجس کی گردن کے اوپری حصے پر چوٹ کے نشانات دیکھائی دیے۔ اس تیندوے کو بوما نمبر 6 میں رکھا گیا تھا۔ اس کی اطلاع مانیٹرنگ ٹیم نے پالپور ہیڈ کوارٹر میں موجود وائلڈ لائف ڈاکٹروں کو دی۔ وائلڈ لائف ڈاکٹروں نے موقعے پر تیجس چیتے کا معائنہ کیا۔ اس کے زخم سنگین نوعیت کے تھے۔ تیجس کو بے ہوش کرنے کی اجازت ملنے کے بعد ڈاکٹروں کی ایک ٹیم تیاریوں کے ساتھ موقعے کی طرف روانہ ہوگئی۔ حالانکہ نر چیتا تیجس کی دوپہر تقریباً دو بجے موت ہو گئی۔ حکام کے مطابق پوسٹ مارٹم کے بعد ہی اس کی موت کی وجہ معلوم ہو سکے گی۔

اب تک سات چیتے مر چکے ہیں

اب تک جنوبی افریقہ سے لائے گئے سات چیتے مر چکے ہیں۔ اس میں تین بچے اور چار بڑے چیتے شامل ہیں۔ اس سے قبل 25 مئی کو مادہ چیتا جوالا کے دو بچے مر گئے تھے۔ چیتوں کی متواتر اموات پر سوالات اٹھائے جا رہے ہیں۔ ماضی میں جنوبی افریقہ کے جنگلی حیات کے ماہر ونسنٹ وار ڈیر مرو نے بھی چیتاوں کی ہلاکت پر تشویش کا اظہار کیا۔ انہوں نے چیتوں کے رہائش گاہوں پر باڑ لگانے کی تجویز پیش کی اور کہا کہ بغیر باڑ والی پناہ گاہوں میں چیتاوں کو دوبارہ متعارف کرانے کی کوششوں کا کامیاب ہونا مشکل ہو گا۔