کیرالہ کے سی ایم کی بیٹی کی کمپنی کے خلاف مرکز کا تحقیقات کا حکم

Centre probe Exalogic Solutions: کارپوریٹ امور کی وزارت نے کیرالہ کے وزیر اعلی پنارائی وجین کی بیٹی کی کمپنی ایکسلاجک کے خلاف تحقیقات کا حکم دیا ہے۔ اس معاملے میں جانچ کے لیے تین رکنی ٹیم تشکیل دی گئی ہے جس کو چار ماہ میں رپورٹ پیش کرنے کو کہا گیا ہے۔

ترواننت پورم: مرکزی حکومت نے کیرالہ کے وزیر اعلی پنارائی وجین کی بیٹی ٹی وینا کی ملکیت والی کمپنی ایکسلاجک شالوشنز کے خلاف تحقیقات کا حکم دیا ہے۔ کمپنی پر الزام ہے کہ اس نے بغیر کوئی خدمات فراہم کیے سی ایم آر ایل سے ماہانہ ادائیگی کے طور پر کروڑوں روپے وصول کیے۔ کارپوریٹ امور کی مرکزی وزارت نے جمعہ کی رات ایکسلاجک کمپنی کے خلاف جانچ کا حکم دیا۔ اس معاملے کی جانچ کے لیے اعلیٰ سطح کی تین رکنی ٹیم تشکیل دی گئی ہے۔ تحقیقاتی ٹیم کو چار ماہ میں اپنی رپورٹ پیش کرنی ہوگی۔ اس جانچ کا اعلان انکم ٹیکس بورڈ کے نتائج کی بنیاد پر کیا گیا ہے۔ کیرالہ اسٹیٹ انڈسٹریل ڈیولپمنٹ کارپوریشن اور سی ایم آر ایل کے خلاف تحقیقات کی جائے گی۔

بنگلورو میں رجسٹرار آف کمپنیز کے ذریعہ کی گئی ابتدائی تحقیقات میں مالی سودوں میں کئی بے ضابطگیاں پائے جانے کے بعد اب تفصیلی جانچ کا حکم دیا گیا ہے۔ سی ایم آر ایل اور کے ایس آئی ڈی سی دونوں کو پہلے اپنے موقف کی وضاحت کے لیے نوٹس دیے گئے تھے۔ جہاں سی ایم آر ایل نے ماہانہ ادائیگی کے تنازع میں مبینہ طور پر الزامات کا مبہم جواب دیا۔ تاہم کے ایس آئی ڈی سی نے کوئی جواب نہیں دیا۔ اس کے بعد ایکسلاجک اور کے ایس آئی ڈی سی کمپنیوں کے لین دین کی تفصیل سے چھان بین کی جا رہی ہے۔