کانگریس پارٹی کے ریاستی کارگزار صدر ایشور کھنڈرے نے کہاکہ بی جے پی حکومت عوام کی ترقی کے لیے کام کرنے کے بجائے مخالف کسان و مزدور پالیسیوں پر گامزن ہے جس کی وجہ سے عوام کو کافی مشکلات پیش آرہی ہیں۔
انہوں نے کہا کہ کسان تقریباً دو ماہ سے زرعی قوانین کے خلاف احتجاج کر رہے ہیں لیکن مرکزی حکومت انہیں نظرانداز کر رہی ہے۔ انہوں نے مرکزی حکومت پر بعض تاجرین کو فائدہ پہنچانے کےلیے عوام کو پریشان کرنے کا الزام عائد کیا۔
کانگریس رہنما نے کرناٹک میں گئوکشی قانون کو غیردستوری طریقے سے نافذ کرنے کا بھی الزام لگایا۔ انہوں نے کہا کہ بی جے پی حکومت من مانی کرنے میں مصروف ہے جبکہ عوام بی جے پی کو ضرور سبق سکھائیں گے۔ کانگریس، ملک بھر میں مرکزی حکومت کی عوام مخالف پالیسیوں سے متعلق عوام کو آگاہ کررہی ہے اور کرناٹک میں بھی ریاستی حکومت کی کسان و مزدور مخالف پالسیوں کے خلاف مہم چلائی جارہی ہے۔
