بنگلور: کرناٹک میں مختلف مقامات پر یوم آزادی کا پرچم لہرایا گیا. اسی طرح شہر کے فیلکن انسٹی ٹیوشنز میں ایک انوکھے اجلاس کا اہتمام کیا گیا۔ جہاں طلباء نے مجاہدین آزادی کے لباس پہنے اور ان کے کردار ادا کئے۔ مہمانان خصوصی شیواجی نگر کے مقامی ایم ایل اے رضوان ارشد، ریٹائرڈ ایئر فورس گروپ کیپٹن ای. آر راجپن، ڈاکٹر سومہ شیکھرپا نے فیلکن ای-ٹیکنو اسکول کے جشن آزادی میں شرکت کی۔ نہایت خوشی کا اظہار کیا کہ انہوں نے معصوم بچوں کے ساتھ یوم آزادی منایا۔
اس موقع پر مہمانان خصوصی نے کہا کہ بھارت میں آزادی کو ختم کرنے کی سازشیں رچی جارہی ہیں، لہذا سبھی بھارتیوں کو ملک کی آزادی کے تحفظ کے لئے اٹھ کھڑے ہونا ہے. رضوان ارشد نے کہا کہ 'بھارت میں ہٹلر جیسی تاناشاہی والی حکومت برسر اقتدار ہے جس سے ملک کے دستور و جمہوریت کو خطرہ ہے، لہذا عوام کو چاہیے کہ وہ ملک کی حفاظت کے لئے آواز بلند کرے'۔ اس موقع پر ادارے کے ڈائریکٹر عبد السبحان نے کہا کہ بھارت میں فرقہ پرست و فسطائی طاقتوں کے ڈیوائڈ اینڈ رول کے ایجنڈے کو ناکام کرکے ملک میں بھائی چارہ کو فروغ دینے کی اشد ضرورت ہے اور اس کے لئے سبھی کو متحد ہوکر کام کرنا ہوگا۔
مزید پڑھیں: آئندہ پانچ سالوں میں بھارت تیسری سب سے بڑی معیشت بن جائے گا: مودی
واضح رہے کہ ملک بھر میں گذشتہ روز 77 ویں یوم آزادی کا جشن منایا گیا۔ اس دوران ملک بھر میں مختلف ریلیاں اور آزادی سے متعلق پروگرامس منعقد کیے گئے جس میں ملک کی آزادی کے لئے اپنی جان نچھاور کرنے والوں کو خراج پیش کیا گیا۔ وہیں دوسری جانب ملک بھر میں مدارس اسلامیہ کی جانب سے بھی مختلف پروگرامس منعقد کیے گئے۔
