بنگلور: کرناٹک میں بی جے پی حکومت کی جانب سے دسویں جماعت کے نصاب میں راشٹریہ سویم سیوک سنگھ کے لیڈر ہیڈگیوار کی ایک تقریر کو شامل کیا گیا ہے RSS Leaders Speech in School Syllabus جس کے بعد کیمپس فرنٹ نے اس پر اعتراض ظاہر کیا ہے۔ بی جے پی حکومت کے اس اقدام سے برہم طلباء تنظیم 'کیمپس فرنٹ' کے لیڈران نے کہا کہ آر ایس ایس اور اس کے لیڈران جنگ آزادی کے دوران برطانوی حکومے کی غلامی اور ملک سے غداری کر رہے تھے لہٰذا ایسے لوگوں کے اسباق نئی نسل کو پڑھانا ہرگز قابل قبول نہیں۔
کیمپس فرنٹ نے حکومت سے مطالبہ کیا ہے کہ فوری طور پر ہیڈگیوار کی تقریر کو اسکولی کتاب میں شامل کرنے کے فیصلے کو رد کرے اور ساتھ ہی اعلان کیا کہ کیمپس فرنٹ کی جانب سے اس کے خلاف ریاست گیر مہم چلائی جائیگی۔ واضح رہے کہ حال ہی میں بی جے پی حکومت نے اسکول کے نصاب سے مجاہد آزادی ٹیپو سلطان سے متعلق اسباق کو نکالا تھا جس سے ایک سیاسی و سماجی سرکلز میں ایک تنازع رہا۔ بی جے پی کے اس اقدام سے ریاستی اپوزیشن پارٹی کانگریس نے بھی زبردست مخالفت کی تھی تاہم بی جے پی حکومت اپنی ضد پر اڑی رہی اور ابھی بھی اسکولی نصاب کے ساتھ چھیڑ چھاڑ جاری ہے۔