جموں: جموں وکشمیر انتظامیہ نے جموں میں اپنے تمام ملازموں سے مولانا آزاد اسٹیڈیم میں منعقد ہونے والی یوم جمہوریہ کی تقریب میں ڈیوٹی کے ایک حصہ کے بطور شرکت کرنے کی ہدایت دی ہے۔
جموں و کشمیر جنرل ایڈمنسٹریٹو ڈیپارٹمنٹ کی جانب سے جاری سرکیولر کے مطابق ملازمین کو مولانا آزاد اسٹیڈیم جموں میں 29 جنوری کی شام ساڑھے چار بجے منعقد ہونے والی ’بیٹنگ ریٹریٹ‘ تقریب میں بھی شرکت کرنے کی ہدایت دی گئی ہے۔
منگل کے روز جاری سرکیولر میں کہا گیا کہ ’جموں میں تعینات حکومت اور پبلک سیکٹر انڈر ٹیکنگ کے افسروں اور اہلکاروں سے کہا جاتا ہے کہ وہ یوم جمہوریہ کی تقریب میں اپنی ڈیوٹی کے ایک حصے کے بطور شرکت کریں‘۔
تمام محکموں کے افسروں اور پبلک سیکٹر انڈر ٹیکنگ کے چیف ایگزیکیٹوز سے کہا گیا کہ وہ یوم جمہوریہ کی تقریب میں اپنی اور اپنے ماتحت ملازموں کی شرکت کو یقینی بنائیں۔
ایک علاحدہ سرکیولر کے مطابق یوم جمہوریہ تقریبات کی ’بیٹنگ ریٹریٹ‘ تقریب مولانا آزاد اسٹیڈیم جموں میں 29 جنوری شام ساڑھے چار بجے منعقد ہونے والی ہے جموں کے تمام محکموں کے افسروں اور اہلکاروں کو اس تقریب میں بھی شرکت کرنے کی ہدایت دی گئی ہے۔
یہ بھی پڑھیں: DGP Chairs Security Meeting پولیس سربراہ نے یوم جمہوریہ کے سلسلے میں سکیورٹی میٹنگ کی صدارت کی
بتادیں کہ یوم جمہوریہ کی سب سے بڑی تقریب مولانا آزاد اسٹیڈیم جموں میں منعقد ہوگی جس کی صدارت جموں وکشمیر کے لیفٹیننٹ گورنر منوج سنہا کریں گے اور سلامی لیں گے۔
