اس قانون کے تحت ۱۵ برس تک رہائش پذیر افراد ڈومیسائل سرٹیفکیٹ حاصل کرنے کے حقدار ہوں گے۔
اس ڈومیسائل قانون سے جموں و کشمیر میں غیر منقولہ جائیداد کے مالک بننے اور سرکاری نوکری اور دوسری مراعات حاصل کرنے کے لوگ اہل ہوں گے۔
تاہم جموں کشمیر پینتھرز پارٹی کے چیرمین نے آج جموں میں کورونا وائرس کے پیش نظر نئے قانون کے خلاف گاندھی نگر میں اکیلے احتجاج کیا۔
انہوں نے کہا کہ جموں و کشمیر کے بے روزگار نوجوانوں کے ساتھ مذاق کیا گیا جبکہ اب ملک بھر کے نوجوان جموں و کشمیر میں نوکریاں حاصل کرسکتے ہیں۔
تاہم یہاں کے نوجوانوں کو بے روزگار بنے پر مجبور کیا گیا ہے ۔
انہوں نے کہا کہ اس قانون کو جلد از جلد واپس لیا جانا چاہیئے تاکہ بے روز گار نوجوانوں کو اپنا حق ملے۔
واضح رہے کہ سابق وزیرِ اعلیٰ و نیشنل کانفرنس کے نائب صدر عمر عبداللہ نے ٹویٹ کرکے نئے قانون کو کھوکھلا قرار دیتے ہوئے کہا ہے کہ یہ اُن یقین دہانیوں کے برعکس ہے جو حکومت نے کئے تھے۔
انہوں نے کہا، "جب ہر ایک کی توجہ کووڈ-19 پر قابو پانے کی کوششوں پر مرکوز ہونی چاہیے تھی حکومت نے اسی دوران یہ قانون نافذ کر کے عوام کے زخم تازہ کر دئے۔''
