جنوبی کشمیر کے ضلع پلوامہ میں ڈی ڈی سی چیئرپرسن اور وائس چیئرپرسن کی سیٹوں پر پیپلز الائنس فار گپکار ڈکلریشن (پی اے جی ڈی) نے جیت درج کی ہے۔
ضلع پلوامہ میں بھی دیگر اضلاع کی طرح 14 ڈی ڈی سی نشستیں ہیں۔ تاہم پی اے جی ڈی کے امیدوار وحید الرحمان پرہ کے زیر حراست ہونے کی وجہ سے ان انتخابات میں 13 ارکان نے شرکت کی۔
پلوامہ ڈی ڈی سی کے چیئرپرسن اور نائب چیئرپرسن کا انتخاب آج عمل میں لایا گیا جس میں پی اے جی ڈی نے چئیرپرسن اور وائس چیئرپرسن کی نشست پر جیت درج کی۔
ضلع پلوامہ میں پی اے جی ڈی نے چیئرپرسن انتخابات میں 9 جبکہ آزاد امیدوار نے 4 ووٹ حاصل کیے اور پی اے جی ڈی کے امیدوار سعید عبدالباری نے کامیابی حاصل کی جو پی ڈی پی سے منسلک ہیں۔
اسی طرح پی اے جی ڈی کے ہی مختار احمد بند جو کہ نیشنل کانفرنس کے ساتھ منسلک ہیں، وائس چیئرپرسن منتخب ہوئے۔
واضح رہے کہ گزشتہ برس کے اواخر میں ہوئے ان انتخابات میں بی جے پی نے 75 جبکہ پیپلز الائنس فار گپکار ڈکلریشن (پی اے جی ڈی ) نے 110 حلقوں پر کامیابی حاصل کی تھی۔ پی ڈی پی کے 27، کانگریس کے 26 جبکہ 42 آزاد امیدوار بھی منتخب ہوئے۔
اس موقع پر سعید عبدالباری نے انتظامیہ کا شکریہ ادا کیا اور انہوں نے کہا کہ ہم لوگوں کے کام کرنے کے لئے منتخب کیے گئے ہیں۔ ہم لوگوں کی امیدوں پر کھرا اترنے کی پوری کوشش کریں گے۔
