نئی دہلی: اتنے بڑے پیمانے پر کھانے کی بربادی کو دیکھتے ہوئے پرانی دہلی کے رہنے والے کاشف قریشی نے اپنی اہلیہ کے ساتھ مل کر ایک مہم کا آغاز کیا ہے۔ دراصل کاشف قریشی دہلی میں شادیوں کی تقریب میں شرکت کرکے وہاں موجود لوگوں کو اپنے منفرد انداز میں کھانا کی بربادی سے روکتے ہیں اور جو لوگ اپنی پلیٹ صاف کرکے کھاتے ہیں ان کی حوصلہ افزائی کے لیے انہیں گلاب کا پھول پیش کرتے ہیں۔
اس کے علاوہ اپنی اس مہم کو لوگوں تک پہنچانے کے لیے ایک سیلفی پوائنٹ بھی تقریب کے دوران تیار کرتے ہیں جسے سوشل میڈیا کے ذریعے مزید افراد تک پہنچاتے ہیں۔ اس مہم میں ہونے والا خرچ کاشف قریشی ذاتی طور پر برداشت کرتے ہیں۔ ای ٹی وی بھارت کے نمائندے محمد راحم سے بات کرتے ہوئے کاشف قریشی نے بتایا کہ انہوں نے گذشتہ برس اس مہم کا آغاز کیا تھا لیکن اس وقت انہیں زیادہ بہتر رد عمل نہیں ملا تھا تاہم رواں برس ان کی اس مہم کو کافی سراہا جا رہا ہے۔
یہ بھی پڑھیں: جامعہ میں 'نئے پرانے چراغ' کے تحت محفل قوالی کا انعقاد
کاشف قریشی اس مہم کو کامیاب بنانے کے لیے قرآن اور حدیث کا بھی سہارا لیتے ہیں۔ وہ جگہ جگہ قرآنی آیات اور احادیث لکھے پوسٹر دعوت میں چسپاں کرتے ہیں، ان کے مطابق لوگ قرآن اور حدیث کا احترام کرتے ہیں اور لوگ ان کی بات پر سنجیدگی کے ساتھ عمل کرتے ہیں۔
