نئی دہلی: لوک سبھا میں آج چندریان 3 مشن کی کامیابی اور خلائی شعبے میں دیگر کامیابیوں پر بحث ہوگی۔ اس کے ساتھ ساتھ قانون سازی کے کام میں بھی حکومت ایڈووکیٹ (ترمیمی) بل 2023 کا تعارف اور منظوری حاصل کرنے کی کوشش کرے گی۔ یہ بل راجیہ سبھا سے پہلے ہی منظور ہو چکا ہے۔
اس کے علاوہ تخمینوں سے متعلق کمیٹی "وزارت صحت اور خاندانی بہبود سے متعلق مختلف اقدامات کا جائزہ" پر اپنی رپورٹ پیش کرے گی۔ داخلہ امور کی اسٹینڈنگ کمیٹی کی جانب سے بھی جیلوں میں اصلاحات پر رپورٹ پیش کی جائے گی۔
تعلیم، خواتین، بچوں، نوجوانوں اور کھیلوں پر ایک اور اسٹینڈنگ کمیٹی قومی تعلیمی پالیسی کے نفاذ پر لوک سبھا میں رپورٹ پیش کرے گی۔ جبکہ صحت سے متعلق اسٹینڈنگ کمیٹی "پردھان منتری ٹی بی مکت بھارت کے نفاذ پر اپنی رپورٹ ایوان میں رکھے گی۔
مزید پڑھیں: پارلیمنٹ کا خصوصی اجلاس، اس میں کیا خاص بات ہے؟
واضح رہے کہ چندریان 3 مشن کی کامیابی پر ملک بھر میں بڑے جوش وخروش سے جشن منایا گیا۔ چندریان 3 مشن کی کامیابی نے خلائی میدان میں ہندوستان کا نام نہ صرف روشن کردیا ہے بلکہ چاند کے جنوبی قطب میں قدم رکھنے والا ہندوستان پہلا ملک بن چکا ہے۔ اور یہ کامیابی ہندوستان کے لئے سائنس کے میدان میں بہت بڑی کامیابی ہے۔ وزیراعظم نریندر مودی نے انڈین اسپیس ریسرچ آرگنائزیشن ( اسرو) کی اس کامیابی پر اسرو کی پوری ٹیم کو مبارک باد پیش کی اور اسرو کی ٹیم سے ملاقات بھی کی۔
