نئی دہلی: جامعہ ملیہ اسلامیہ کے شعبۂ میکانیکل انجینئرنگ میں ’پروفیشنل کیریئر میں ضابطۂ اخلاق کی اہمیت‘ کے موضوع پر آٹھواں پروفیسر عبدالمبین یادگاری خطبہ منعقد ہوا۔ مولانا آزاد نیشنل انسٹی ٹیوٹ آف ٹکنالوجی، بھوپال، مدھیہ پردیش کی (سبک دوش) پروفیسر گائتری اگنی ہوتری نے یہ یادگاری خطبہ پیش کیا۔ گزشہ کئی برسوں سے یہ شعبہ پروفیسر عبدالمبین یادگاری خطبہ منعقد کررہا ہے۔ اس موقع کی مہمان اعزازی اور مقرر پروفیسر گائتری اگنی ہوتری، ایم اے این آئی ٹی، بھوپال کی سابق طالب علم رہ چکی ہیں اور سال انیس سو پینسٹھ میں انھیں اس ادارے کی پہلی لڑکی طالب علم ہونے کا بھی اعزاز حاصل ہے۔ انھوں نے آئی آئی ٹی، دہلی سے پی ایچ ڈی کی اور ایم اے این آئی ٹی میں مختلف حیثیتوں سے بیالیس برسوں تک اپنی خدمات انجام دینے کے بعد سبکدوش ہوئی ہیں۔ وہ اے آئی سی ٹی ای اور این بی اے کی ماہر رکن بھی ہیں۔
یہ بھی پڑھیں:
مہمان اعزازی کی تکریم کے بعد صدر شعبۂ میکانیکل انجینئرنگ پروفیسر زاہد اختر نے سامعین سے خطاب کیا جس میں انھوں نے سابق صدر شعبہ اور بنیاد گزار رکن پروفیسر عبدالمبین کی خدمات کا ذکر کیا۔ اپنی تقریر میں پروفیسر گائتری اگنی ہوتری نے پروفیسر عبدالمبین کے ساتھ گزرے ہوئے لمحات کی چند یادیں شیئر کیں۔ انھوں نے پیشہ ورانہ زندگی میں ضابطۂ اخلاق کی اہمیت کے حوالے سے سامعین کو روشناس کرایا۔ انھوں نے اخلاق اور ضابطۂ اخلاق کے درمیان تفریق کی وضاحت کی اور یہ بھی واضح کیا کہ پیشہ ورانہ زندگی میں ان کو سب سے زیادہ ترجیح دی جانی چاہیے۔ خطبہ کے بعد لوگوں نے سوالات پوچھے جس کے تشفی بخش جوابات دیے گئے۔ بی ٹیک کی طالبہ ضویا انس نے پروگرام کی نظامت کی۔ اخیر میں پروگرام کے کنوینر پروفیسر صباح خان نے پروفیسر عبدالمبین سے وابستہ اپنی یادیں ساجھا کرتے ہوئے پروفیسر اگنی ہوتری کے ساتھ ساتھ سامعین اور جامعہ انتظامیہ کا بھی شکریہ ادا کیا۔
واضح رہے کہ پروفیسر عبدالمبین نے انیس سو چوہتر میں کانپور سے آئی آئی ٹی سے پی ایچ ڈی کی ڈگری حاصل کی۔ ایم اے سی ٹی بھوپال، آئی آئی ممبئی اور امریکی یونیورسٹی میشی گن ٹیکنالوجیکل یونیورسٹی میں اپنی خدمات دینے کے بعد جامعہ انیس سو پچاسی میں جامعہ ملیہ اسلامیہ جوائن کیا۔ انھوں نے شعبۂ میکانیکل انجیرئنگ، فیکلٹی آف انجینرنگ، جامعہ ملیہ اسلامیہ میں بطور صدر اپنی خدمات بھی انجام دیں۔ آٹھویں پنچ سالہ منصوبہ میں انھوں نے فیکلٹی کی عمارت کی تعمیر کی ذمہ داری بھی سر انجام دی۔ پروفیسر عبدالمبین ایک ممتاز علمی ہستی، بے مثل استاد، محقق اور سب سے بڑھ کر ایک اچھے اور مخلص انسان تھے۔
