بھاگلپور میں سمسیا نوارن سمیتی کے ذریعہ کورونا ویکسین کیمپ کا انعقاد

بھاگلپور کی سماجی تنظیم سمسیا نوارن سمیتی نے کورونا ٹیکہ کاری کیمپ کا انعقاد کیا ہے۔ یہ سماجی تنظیم ہفتہ میں ایک بار شہر کے مختلف علاقوں میں باری باری سے ویکسینیشن کیمپ لگارہی ہے۔

ریاست بہار کے ضلع بھاگلپور کی سماجی تنظیم سمسیا نوارن سمیتی نے کورونا ٹیکہ کاری کے لیے ہفتہ واری پروگرام شروع کیا ہے۔ ماہرین کا ماننا ہے کہ کورونا سے نجات کا واحد راستہ ٹیکہ کاری ہے اور اس کے لیے حکومت کے ساتھ ساتھ سماجی تنظیمیں بھی پیش پیش ہیں، اسی سلسلے میں سماجی تنظیم سمسیا نوارن سمیتی نے بھی لوگوں کو کورونا سے محفوظ رکھنے کے لیے ویکسینیشن مہم کی شروعات کی ہے۔

یہ سماجی تنظیم ہفتہ میں ایک بار شہر کے مختلف علاقوں میں باری باری سے ویکسینیشن کیمپ لگا رہی ہے۔ تنظیم کے صدر تقی احمد جاوید بتاتے ہیں کہ ان کی تنظیم کے تحت اب تک ہزاروں لوگوں کو ٹیکہ لگوایا جاچکا ہے۔ کورونا ویکسین کے حوالے سے لوگوں میں پہلے غلط فہمیاں پائی جارہی تھی لیکن اب دھیرے دھیرے لوگوں کا خدشہ دور ہورہا ہے اور وہ بلا خوف ٹیکہ لے رہے ہیں۔ پورے بہار میں بھاگلپور ویکسینیشن کے حوالے سے پہلے نمبر پر ہے۔

سمسیا نوارن سمیتی نے عام لوگوں سے اپیل کی کہ وہ زیادہ سے زیادہ تعداد میں ٹیکہ لگوائیں، تاکہ کورونا وبا کو شکست دی جاسکے۔ کیونکہ کورونا کی وجہ سے ہر شعبہ متاثر ہورہا ہے، اس سے قبل ٹیکہ کاری کیمپ کا افتتاح چھپرہ یونیورسٹی کے وائس چانسلر ڈاکٹر فاروق علی نے کیا۔