گیا: اردو کے معتبر محقق و ممتاز رباعی گو، معروف شاعر اور بچوں کے ادب کے ماہر ڈاکٹر ظفر کمالی کو 2022 کے لیے بزمِ صدف کا بین الاقوامی ادبی ایوارڈ تفویض کیا جائے گا۔ سیوان (بہار) کے شعبۂ فارسی کے استاد ڈاکٹر ظفر کمالی ہند و پاک کے لکھنے والوں میں اعتبار کا درجہ رکھتے ہیں۔ جنھوں نے ایک ساتھ کئی اصناف میں اپنی خدمات انجام دیں۔ رباعیات، تحقیق، ادبِ اطفال اور ظریفانہ ادب جیسے مختلف ادبی و علمی شعبوں میں ان کی خدمات کا ایک عالم معترف ہے۔ بزمِ صدف کی مرکزی ایوارڈ کمیٹی اور مرکزی گورننگ کونسل کے اراکین نے متفقہ طور پر ڈاکٹر ظفر کمالی کو 2022ء کے ایوارڈ کے لیے منتخب کیا ہے۔ واضح ہو کہ گزشتہ سال انھیں ادبِ اطفال کے لیے ساہتیہ اکادمی نے بھی اپنے ایوارڈ سے نوازا تھا۔
یہ بھی پڑھیں:
ASBK Adbi Award مختلف شعبوں سے وابستہ شخصیات کو اسباق ادبی ایوارڈ 2023 سے نوازا گیا
ایوارڈ کا اعلان کرتے ہوئے بزمِ صدف کے ڈائریکٹر پروفیسر صفدر امام قادری اور چیئرمین شہاب الدین احمد نے ظفر کمالی کو ان کی ادبی خدمات کے لیے مبارک باد دی اور یہ توقع ظاہر کی کہ بزمِ صدف کے سابقہ انعام یافتگان کے معیاری سلسلہ کا لازمی طور پر وہ بھی حصہ بنیں گے اور عالمی طور پر ان کی ادبی اہمیت کا اعتراف کیا جائے گا۔ پروفیسر صفدر امام قادری نے بتایا کہ بزمِ صدف نے اب تک چھ افراد کو ایوارڈ سے نوازا ہے جن میں جاوید دانش، مجتبیٰ حسین، باصر سلطان کاظمی، مظفر حنفی، غضنفر اور محترمہ شاہدہ حسن کو اب تک بزمِ صدف کے بین الاقوامی ایوارڈس پیش کیے جاچکے ہیں۔ ایوارڈ تقریبات دوحہ قطر، پٹنہ اور حیدرآباد میں منعقد ہوئی ہیں، اس بار دوحہ قطر اور دوبئی میں اس کا اہتمام ہورہا ہے۔
سیوان ضلع سے ہے ان کا تعلق
نامزد ایوارڈ یافتہ ڈاکٹر ظفر کمالی کا تعلق سیوان ضلع سے ہے۔ 3 اگست 1959 کو سیوان کے قصبہ رانی پور میں پیدا ہوئے۔ ان کے والد کا نام کمال الدین ہے۔ انھوں نے بڑہریا ہائی اسکول سیوان، ذکیہ آفاق اسلامیہ کالج، سیوان، اورینٹل کالج، پٹنہ سٹی اور پٹنہ یونیورسٹی پٹنہ سے تعلیم حاصل کی۔ اردو اور فارسی میں ایم اے کے ساتھ بی ایڈ اور پی ایچ ڈی کی سندیں بھی حاصل کیں۔ 1989 سے وہ شعبۂ فارسی میں درس و تدریس کے فرائض انجام دے رہے ہیں۔ ظفر کمالی کی پہلی تصنیف ’مکاتیبِ ریاضیہ‘ ہے جو 1986 میں شائع ہوئی تھی۔ رباعیات کے چار مجموعے رباعیاں، رباعیاتِ ظفر، خاکِ جستجو، سوغات ہیں، ظریفانہ کلام کے چار مجموعے ظرافت نامہ، نمک دان، ڈنک، ضربِ سخن، تنقید و تحقیق سے متعلق تین کتابیں متعلقاتِ احمد جمال پاشا، تحقیقی تبصرے اور احمد جمال پاشا (مونوگراف) ادب اطفال سے متعلق تین کتابیں بچوں کا باغ، چہکاریں اور حوصلوں کی اڑان شائع ہوئیں۔ ان کی مرتبہ کتابوں میں مکاتیبِ ریاضیہ، مکاتیب بنام حکیم مظہر، جنوں کی آگہی، چٹکیاں اور بنامِ مجتبیٰ حسین شامل ہیں۔
ظفر کمالی کے بین الاقوامی ایوارڈ کے لیے منتخب ہونے کی اطلاع پاکر بزمِ صدف کی مختلف قومی اور بین الاقوامی شاخوں کے عہدے داران نے انھیں مبارک باد پیش کی ہے اور یہ امید ظاہر کی ہے کہ ان کی تصنیف و تالیف اور ناموری کا حلقہ مزید وسیع ہوگا۔ دوحہ قطر سے حسن عبد الکریم چوگلے، محترمہ صوفیہ بخاری، ڈاکٹر ندیم ظفر جیلانی دانش، عمران اسد، احمد اشفاق، عرفان اللہ، کویت سے مسعود حساس، دوبئی سے امتیاز صدیقی، ہندوستان سے پروفیسر ظفر امام، ڈاکٹر واحد نظیر، ڈاکٹر تسلیم عارف، ڈاکٹر افشاں بانو، محمد مرجان علی وغیرہ نے ہدیۂ تبریک پیش کرتے ہوئے ظفر کمالی کے لیے صحت و تندرستی کی دعائیں دی ہیں اور توقع ظاہر کی ہے کہ اس ایوارڈ کے بعد ظفر کمالی کی تصنیفی سرگرمیوں میں مزید اضافہ ہوگا اور ان کے قبول عام کا دائرہ وسیع ہوگا۔ گیا کے علمی اور ادبی حلقوں نے ڈاکٹر کمالی کو مبارک باد پیش کی ہے۔
