ریاست بہار کے ضلع مونگیر کے معروف مدرسہ جامعہ رحمانی مونگیر کے ہاسٹل کی تعمیر کے لیے مرکزی وزیر رام بلاس پاسوان نے 50 لاکھ روپئے کا تعاون اپنے پارلیمانی کوٹے سے کرنے کا اعلان کیا ہے۔
جامعہ رحمانی مونگیر میں اس وقت ایک ہزار سے زائد طلبا زیر تعلیم ہیں۔
مدرسے کے سرپرست اعلی بھارت کے معروف عالم دین اور آل انڈیا مسلم پرسنل لابورڈ کے جنرل سکریٹری مولانا محمد ولی رحمانی ہیں۔
بھارت میں اسلامی تعلیم دینے والے تعلیمی اداروں میں جامعہ رحمانی کا نام بھی سرفہرست ہے۔ اس ادارے کی اپنی منفرد شناخت ہے۔
غریب و نادار بچوں کو مسابقتی تعلیم دلانے میں بھی مولانا ولی رحمانی کی بیش بہا خدمات ہیں۔ انہوں نے ہی رحمانی 30 کی شروعات کی جس سے آج ہزاروں اقلیتی طلبا فیضیاب ہوئے ہیں اور یہ سلسلہ ہنوز جاری ہے۔
مرکزی وزیررام بلاس پاسوان نے اپنے ٹوئٹ پیغام میں اس بات کی اطلاع دی ہے۔
