پٹنہ: ماہر تعلیم اور بہار پردیش کانگریس کی سیاسی امور کی کمیٹی کے رکن ڈاکٹر چندریکا پرساد یادو نے بہار اور اترپردیش کے لوگوں کے خلاف توہین آمیز تبصرہ کرنے پر ڈی ایم کے رکن پارلیمنٹ دیاندھی مارن کو قانونی نوٹس بھیجا ہے۔ انہوں نے یہ انتباہ بھی دیا کہ اگر دیاندھی مارن نے 15 دنوں کے اندر ہندی بولنے والی دونوں ریاستوں کے لوگوں سے معافی نہیں مانگی تو ان کے خلاف قانونی کارروائی کی جائے گی۔
کانگریس لیڈر چندریکا یادو نے یہ بھی کہا کہ دیاندھی مارن شاید یہ نہیں جانتے کہ ان کی ریاست میں بہت سے آئی اے ایس اور آئی پی ایس افسران بہار اور یوپی سے ہی ہیں۔ یہاں تک کہ محکمہ پولیس میں اعلیٰ ترین عہدوں پر بہار کے لوگ نے نہ صرف تمل ناڈو بلکہ پورے بھارت میں خدمات انجام دے رہے ہیں۔
بہار کے نائب وزیراعلیٰ تیجسوی یادو نے بھی دیاندھی مارن کے بیان کی مذمت کی ہے۔ انہوں نے کہا کہ بھارت ایک ملک ہے۔ اس لیے ایک ریاست کے لوگوں کو دوسری ریاست کے لوگوں کا احترام کرنا چاہیے۔ سب کو ایسے بیانات دینے سے گریز کرنا چاہیے۔ تیجسوی نے یہ بھی کہا کہ ڈی ایم کے سماجی انصاف پر یقین رکھتی ہے، پھر بھی اگر اس کے ممبران پارلیمنٹ ایسے بیان دیتے ہیں تو یہ انتہائی قابل مذمت ہے۔
دراصل تمل ناڈو کی حکمراں جماعت ڈی ایم کے کے لوک سبھا رکن پارلیمنٹ دیاندھی مارن سے متعلق ایک ویڈیو سوشل میڈیا پر وائرل ہو رہا ہے، جس میں انہوں نے مبینہ طور پر ہندی بولنے والوں کے بارے میں توہین آمیز بات کہتے ہوئے سنا جاسکتا ہے۔ انہوں نے کہا کہ یوپی اور بہار سے ہندی بولنے والے تمل ناڈو میں یا تو تعمیراتی کام کرنے یا بیت الخلاء کی صفائی کے لیے آتے ہیں۔ ان کے اس بیان کی بی جے پی کے ساتھ ساتھ انڈیا اتحاد کے رہنماؤں نے بھی سخت مذمت کی ہے۔
یہ بھی پڑھیں
