اترپردیش کے الیکشن میں آل آنڈیا مجلس اتحاد المسلمین All India Majlis E Ittehadul Muslimeen پوری مضبوطی کے ساتھ اتر رہی ہے، کئی مرحلوں میں ہونے والے انتخابات کے امیدواروں کی فہرست جاری List of MIM Candidates Released کر دی گئی ہے۔ مزید آگے اور بھی کیا جانا ہے۔
اس ضمن میں بہار کے رکن اسمبلی اور ایم آئی ایم رہنما اخترالایمان نے کہا اتر پردیش کی عوام نے تمام حکومتوں کو دیکھ لیا، خواہ وہ بی جے پی، کانگریس، بہوجن سماجوادی پارٹی ہو یا سماجوادی پارٹی سبھی نے یوپی کی عوام بالخصوص اقلیتوں کے ساتھ دھوکہ کیا ہے۔
انہیں ترقی کا سبز باغ دکھا کر صرف ووٹ حاصل کیا گیا مگر جو سہولیات انہیں فراہم کرنی چاہیے تھی اس میں تمام پارٹیاں ناکام رہی۔ ہم اس جمود کو توڑنے کے لئے آگے بڑھے ہیں، مجلس صرف انصاف اور ترقی کی بات کرتی ہے۔
ایم آئی ایم بہار کے ریاستی صدر اخترالایمان نے ملک کے معروف عالم دین مولانا خلیل الرحمٰن سجاد نعمانی کے خط کے حوالے سے کہا کہ وہ ان کا ذاتی خط ہے۔ آل انڈیا مسلم پرسنل لاء بورڈ کا خط نہیں ہے، تاہم ہم اپنے بزرگوں کا احترام کرتے ہیں، ان کے مشورے سے ہی آگے بڑھتے ہیں۔ انہوں نے اس جانب اشارہ کیا ہے کہ اس پر پارٹی کے اندر غور و خوض کیا جائے گا۔ انہوں نے کہا کہ ویسے بھی مجلس یوپی میں تمام سیٹوں پر اپنے امیدوار نہیں اتار رہی ہے بلکہ جہاں ہماری پوزیشن اچھی ہے ایسے ایک سو سیٹوں پر ہم اپنے امیدوار کھڑا کر رہے ہیں۔
اخترالایمان نے کہا کہ سیاست جرات مندی اور حکمت عملی کا نام ہے۔ ہم شروع سے اور جرات مندی کے ساتھ اقلیتوں کی آواز اٹھاتے رہے ہیں۔ آخر ہم اپنے حق کا مطالبہ ہی تو کر رہے ہیں جو ہمیں آئین دیتا ہے۔ مسلمان جس زبوں حالی کے شکار ہیں اس کا مداوا کون کرے گا۔ آج کون پارٹی ہے جو اقلیتوں کی ناخواندگی، بے روزگاری اور صنعت کاری کی بات کرتی ہے۔ کوئی نہیں ہمیں اب تک صرف ووٹ بینک بنا کر رکھا گیا مگر اب اتر پردیش کی عوام ایسے لوگوں کے جھانسے میں نہیں آئے گی۔
