جنوبی کشمیر میں ضلع اننت ناگ کے کھرم علاقہ میں حضرت ابو بکر صدیق رضی اللہ عنہ کا عرس پاک نہایت ہی جوش و جذبے کے ساتھ منایا گیا۔ اس موقع پر ہزاروں فرزندان توحید کھرم درگاہ میں تبرکات کی زیارت سے فیضیاب ہوئے۔
بجبہاڑہ میں خلیفہ اول حضرت ابو بکر صدیق رضی اللہ عنہ کے عرس پاک پر ضلع کے اطراف و اکناف سے لوگ کھرم درگاہ پہنچے۔
اس موقع پر گزشتہ شب سے ہی کھرم درگاہ میں درود و اذکار اور وعظ و تبلیغ کی روح پرور محفلوں کا انعقاد کیا گیا تھا۔ جس میں عقیدت مندوں کی خاصی تعداد شریک ہوئی۔
درگاہ کے منتظمین کے مطابق عرس پاک کے موقع پر دن میں کئی مرتبہ مقدس زیارات سے لوگ فیضیاب ہوکر روحانی تسکین حاصل کرتے ہیں۔
اُنہوں نے ٹھنڈ کے باوجود اجتماع میں شریک ہونے والے زائرین کا شکریہ ادا کیا۔
دریں اثنا وادی کشمیر کے مختلف مقامات پر جمعہ کو حضرت ابو بکر صدیق رضی اللہ عنہ کے عرس پاک کے موقع پر مجالس و محافل کا اہتمام کیا گیا۔
