دوحہ: سنیل چھیتری کی قیادت میں بھارتی فٹ بال ٹیم اے ایف سی ایشین کپ 2023 میں شرکت کے لیے دوحہ پہنچ گئی ہے۔ ہفتہ کی شام یہاں پہنچنے والی بھارتی ٹیم کا پرجوش استقبال کیا گیا۔ بھارتی ٹیم 23 مہمان ٹیموں میں سے وہاں پہنچنے والی پہلی ٹیم ہے۔ بھارتی ٹیم اپنا پہلا میچ آسٹریلیا کے خلاف کھیلے گی۔
26 کھلاڑیوں کے دستے میں کچھ اہم کھلاڑی جیسے انور علی، جیکسن سنگھ تھوناوجم، عاشق کرونین اور روہت کمار زخمی ہونے کی وجہ سے شامل نہیں ہوسکے۔ نئے سال کے موقع پر میڈیا سے بات کرتے ہوئے، بھارتی ٹیم کے ہیڈ کوچ ایگور اسٹیمک نے کہا ’’ہم یہاں جلد آنا چاہتے تھے، یہاں مناسب طریقے سے ڈھلنا چاہتے تھے اور بعد میں سفر کرنے میں وقت ضائع نہیں کرنا چاہتے تھے۔ ہم آج ایک ساتھ اپنا کام شروع کر رہے ہیں۔ ہم نے اپنا شیڈول طے کیا ہے جس میں دو دنوں میں چار سیشن ہوں گے، تیسرے دن آرام کریں گے ۔ 7 جنوری کو ہم ایک پریکٹس میچ کھیلیں گے۔
انہوں نے کہا کہ ’’گزشتہ چند مہینوں میں چوٹوں کی وجہ سے ہمارے لیے چیزیں ڈرامائی طور پر تبدیل ہوئیں۔ ہم اس وقت اتنے اچھے نہیں ہیں جتنے ہم ہو سکتے تھے۔ ہم نے جسمانی صلاحیت اور پاسنگ کی صلاحیت کھو دی ہے۔ لیکن ہمارے پاس اس کے بارے میں سوچنے کا وقت نہیں ہے اور ہمیں ان لوگوں پر توجہ مرکوز کرنے کی ضرورت ہے جو یہاں ہمارے ساتھ ہیں۔” (یو این آئی)
