پاکستان کے شہر کراچی کے نیشنل اسٹیڈیم پر پاکستان سُوپر لیگ (پی ایس ایل) کے میچز کھیلے جارہے ہیں۔ اتوار کی رات کھیلے گئے واحد میچ میں کراچی کنگز نے شرجیل خان اور محمد نبی کی شاندار نصف سنچریوں کی مدد سے مقررہ 20 اوورز میں 9 وکٹ پر 186 رنز بنائے اور مخالف ٹیم کو 187 رنز کا ہدف دیا۔
لاہور قلندرز نے کراچی کنگز کا 187 رنز کا ہدف 19 اعشاریہ 2 اوورز میں حاصل کرکے پوائنٹس ٹیبل پر کراچی کنگز سے دوسری پوزیشن بھی چھین لی اور اس طرح پی ایس ایل سیزن 5 کی رنراپ ٹیم نے چھٹے ایونٹ کے پہلے ہی مرحلے میں دفاعی چمپیئن کراچی کنگز سے حساب برابر کردیا اور میچ 6 وکٹ سے جیت لیا۔
لاہور قلندرز کی طرف سے فخر زمان نے 54 گیندوں پر 83 رنز کی شاندار اننگز کھیلی، بین ڈنک نے 57 اور ڈیوڈ ویسا نے 31رنز کی ناقابل شکست اننگز کھیلی اور ٹیم کی فتح میں نمایت اہم کردار ادا کیا۔
اس سے قبل کراچی کنگز کی جانب سے جہاں شرجیل خان نے 6 چھکوں اور 5 چوکوں کی مدد سے 64 رنز کی اننگز کھیلی، وہیں دوسری جانب محمد نبی نے 35 گیندوں پر تیز رفتار 57 رنز بنائے۔ جب کہ لاہور قلندرز کے شاہین شاہ آفریدی نے 3 وکٹیں لی، احمد دانیال، حارث رؤف، ڈیوڈ ویسا اور سمِت پٹیل نے 1،1 وکٹ اپنے نام کی۔
ہدف کے تعاقب میں لاہور قلندرز کے کپتان سہیل اختر اور جوڈینلی، محمد عامر کے پہلے ہی اوورز میں پویلین لوٹ گئے، محمد حفیظ بھی 15 رنز بناکر وقاص مقصود کا شکار بن گئے۔ تیسری وکٹ پر اوپنر فخر زمان نے بین ڈنک کے ساتھ مل کر 119 رنز کی قیمتی شراکت قائم کی،152 کے اسکور پر فخر کرسٹیان کی گیند پر کیچ آؤٹ ہوگئے، انہوں نے 54 گیندوں پر 83 رنز کی شاندار اننگز کھیلی۔
اس موقع پر میچ دلچسپ مرحلے میں داخل ہوگیا، لاہور قلندرز کو 16گیندوں پر 35رنز درکار تھے، ایسے میں دیوڈ ویسا نے 9 گیندوں پر 31 رنز کی دھواں دھار اننگز کھیلی اور میچ 4 گیندوں قبل ہی ختم کردیا۔ شاہین شاہ آفریدی کو بہترین بولنگ پر میچ کے بہترین کھلاڑی کا ایوارڈ دیا گیا۔
