پنکج تریپاٹھی بھارتی اداکار ہیں جو بنیادی طور پر ہندی فلموں میں نظر آتے ہیں۔ انہوں نے 2004 میں فلم 'رن' اور 'اومکارا' میں معمولی کردار سے فلمی کریئر کی شروعات کی تھی اور اس کے بعد ابھی تک کم و بیش 60 سے زائد فلموں اور 60 ٹیلی ویژن شوز میں کام کر چکے ہیں۔
سنہ 2012 میں ریلیز ہونے والی گینگس آف واسع پور فلم سیریز سے پنکج تریپاٹھی کو شہرت ملی اور اس کے بعد سے انہوں نے متعدد فلموں مین کا کیا جس میں فُکرے(2013)، مسان (2015)، نِل بٹے سناٹا(2016)، بریلی کی برفی (2017)، نیوٹن (2017)، فُکرے ریٹرنز (2017) اور اِستری (2018) شامل ہیں۔
فلم نیوٹن کے لیے پنکج تریپاٹھی نے کئی ایوارڈ حاصل کیے جن میں نیشنل فلم ایوارڈ بھی شامل ہے۔
پنکج تریپاٹھی 5 ستمبر 1976 کو ریاست بہار کے شہر بیلسند میں پیدا ہوئے تھے۔ وہ اپنے چار بھائی بہنوں میں سب سے چھوٹے تھے۔ ان کے والد کسان اور پادری کے طور پر کام کرتے ہیں۔
پنکج تریپاٹھی نے اپنے والد کے ساتھ بطور کسان کام کیا جب تک کہ وہ اسکول میں 11 ویں جماعت میں تھے۔
تہواروں کے ایام میں گاؤں میں ہونے والے ناٹک میں پنکج تریپاٹھی لڑکی کا کردار ادا کرتے تھے جسے دیہاتیوں نے خوب سراہا۔
وہ ہائی اسکول کے بعد پٹنہ گئے جہاں انسٹی ٹیوٹ آف ہوٹل مینجمنٹ، حاجی پور میں تعلیم حاصل کی۔ اس دوران انہوں نے تھیٹر کیا اور کالج کی سیاست میں سرگرم ہوگئے۔
اداکاری میں ناکامی کے خوف سے پنکج تریپاٹھی نے پٹنہ کے ایک فائیو اسٹار ہوٹل میں بھی مختصر طور پر کام کیا۔ پٹنہ میں تقریباً سات سال قیام کے بعد وہ نیشنل اسکول آف ڈرامہ میں داخلہ لینے کے لیے دہلی چلے گئے جہاں سے انہوں نے 2004 میں گریجویشن مکمل کیا۔
نیشنل اسکول آف ڈرامہ سے پاس آؤٹ ہونے کے بعد پنکج تریپاٹھی 2004 میں ممبئی گئے۔ پہلے انہوں نے ٹاٹا ٹی اشتہار میں سیاستداں کا کردار ادا کیا اور بعد میں فلم 'رن' میں ایک معمولی کردار ادا کیا۔
سنہ 2012 میں پنج ترپاٹھی کو اس وقت بڑی کامیابی ملی جب انہیں گینگس آف واسع پور میں اپنے کردار کے لیے بڑے پیمانے پر سراہا گیا۔ اس فلم کے لیے ان کا آڈیشن تقریباً آٹھ گھنٹے تک جاری رہا۔
سنہ 2008 میں انہوں نے باہوبلی ٹی وی سیریز میں کام کیا اور بعد میں سونی ٹی وی پر پاؤڈر میں۔ اپنے ابتدائی کریئر میں پنکج تریپاٹھی نے زیادہ تر منفی کردار ادا کیے۔
بعد میں انہوں نے مختلف قسم کے کردار ادا کیے اور فلم نقادوں کی داد وصول کی۔ بطور مرکزی اداکار ان کی پہلی فلم 2017 کی فلم گڑگاؤں تھی۔
سنہ 2017 میں ریلیز ہونے والی فلم 'نیوٹن' بہترین غیر ملکی فلم کے زمرے میں اکیڈمی ایوارڈ کے لیے بھارت کی جانب سے باضابطہ شامل ہوئی تھی۔
اس کے علاوہ سنہ 2018 کی ویب سیریز 'مرزا پور' اور 'مرزا پور سیزن 2' میں ان کے کردار قالین بھیا کی بھی کافی سراہنا ہوئی تھی۔
