بالی ووڈ کے دبنگ اداکار سلمان خان کرناٹک کے ایک نوجوان طالب علم کو امداد فراہم کرنے کے لئے آگے آئے ہیں، جنہوں نے اپنے والد کو کووڈ 19 کے باعث کھو دیا ہے۔
ایک ویب سائٹ کی رپورٹ کے مطابق کرناٹک سے تعلق رکھنے والے 18 سالہ سائنس کے طالب علم کی مدد کی درخواست یووا سینا کے رہنما راہل ایس کنال نے سلمان خان سے کی تھی، جو بیئنگ ہنگری فوڈ ٹرکز انیشیٹیو پر سپر اسٹار کے ساتھ مل کر کام کررہے ہیں۔
ویب سائٹ سے گفتگو کرتے ہوئے کنال نے کہا کہ 'ہم نے انہیں راشن اور تعلیمی سامان مہیا کرایا ہے۔ ہم ان کے لئے ہمیشہ حاضر رہیں گے اور ان کی بہتری کے لئے جو بھی ضرورت ہو وہ انہیں فراہم کریں گے۔'
سلمان کے مداحوں کا کنبہ ہمیں دوسروں کی مدد کرنے میں تعاون کر رہا ہے۔ سلمان نے ہمیں باہر جانے اور ضرورتمند ہر انسان کے لئے حاضر رہنے کی ہدایت کی ہے۔ وہ ہر اس درخواست سے بھی واقف ہیں جو ان سے کی جاتی ہے اور جس کی مدد ہم کر رہے ہیں۔
دریں اثنا اپنے والدین کے حسن سلوک سے متاثر ہو کر سلمان نے اپنے چینی ریستوراں بھائیجانز کچن کے ذریعے کووڈ 19 فرنٹ لائن کارکنوں کو کھانے کے پیکٹ فراہم کرنے کا اقدام شروع کیا ہے۔
راہل کے ذریعے انجام دئے جانے والے اس اقدام پر فی الحال کم سے کم 5،000 فرنٹ لائن کارکنوں کو کھانے کے پیکٹ مہیا کرنے کا ہدف ہے جن میں پولیس اہلکار، صحت کارکنان اور کنٹینمنٹ زون میں رہنے والے افراد شامل ہیں۔
بھائی جانز کچن میں تیار کردہ کھانا ممبئی میں بیئنگ ہنگری وین کے ذریعہ فراہم کیا جاتا ہے۔
