انقرہ: ترکی کے صدر رجب طیب ایردوان نے کہا کہ یہ ضروری ہے کہ سلامتی کونسل میں اصلاحات کی جائیں اور ایک شفاف اور موثر سلامتی کونسل کا قیام عمل میں لایا جائے جو کہ تمام رکن ممالک کے لیے مساوی حقوق کی علمبرار بنے۔ انہوں نے اقوام متحدہ کی سلامتی کونسل میں اصلاحات کرنے کی تجویز کا اعادہ کیا ہے۔ صدر ایردوان نے اس ضمن میں چوبیس اکتوبر یوم اقوام متحدہ اور اس کے 77 ویں یوم تاسیس کی مناسبت سے ایک پیغام جاری کیا۔
ترکی میڈیا کے مطابق صدر نے کہا کہ ترکی کا شمار عالمی سطح پر امن و سلامتی،حقوق انسانی اور ترقیاتی شعبوں میں اقوام متحدہ کی زیر نگرانی سرگرمیوں میں اہم کردار ادا کرنے والے ممالک میں ہوتا ہے۔ انہوں نے کہا کہ اقوام متحدہ کے عام بجٹ میں سب سے زیادہ معاونت کرنے والے بیس ممالک میں ترکی بھی شامل ہے جس کے علاوہ استنبول میں اقوام متحدہ سے متعلقہ مختلف ذیلی اداروں اور ایجنسیوں کے علاقائی دفاتر بھی موجود ہیں، سیکریٹری جنرل انتونیو گوٹیرش کے ساتھ تعاون کے نتیجے میں یوکرینی اناج کو دنیا تک پہنچانے کا فریضہ بھی احسن طریقے سے ہم ادا کرر رہے ہیں، استنبول معاہدے کے نتیجے میں اب تک 8 ملین ٹن اناج اور دیگر مصنوعات کی برآمدات کی گئی ہیں جس کی بحفاظت ترسیل کیلیے سفارتی کوششوں کو سلسلہ جاری ہے۔
ایردوان نے کہا کہ عالمی امن و سلامتی کو درپیش اسلامو فوبیا اور ثقافتی نسل پرستی کے خلاف ہماری کوششوں سے 15 مارچ کو اسلامو فوبیا کے خلاف جنگ کا عالمی دن منانے کا اعلان کیا گیا تھا،نفرت کے ماحول کو معاشرتی امن پر مسلط نہ کرنے کی خاطر اقوام متحدہ کی چھت تلے ہم دو طرفہ سفارتی کوششوں کا سلسلہ جاری رکھیں گے،ہر روز ہزاروں معصوم انسانوں کا جانی نقصان بچانے کے لیے اقوام متحدہ کو زیادہ موثر کردار ادا کرنے کی ضرورت ہے جس کے لیے ضروری ہے کہ سلامتی کونسل میں اصلاحات کی جائیں اور ایک شفاف اور موثر سلامتی کونسل کا قیام عمل میں لایا جائے جو کہ تمام رکن ممالک کے لیے مساوی حقوق کی علمبرار بنے۔ ترکیہ، اقوام متحدہ اور اس کے مقرر کردہ قواعد کی روشنی میں سرگرمیوں اور تعاون کو جاری رکھے گا، ترکی،اقوام متحدہ کے 77 ویں یوم تاسیس کی مبارک باد پیش کرتے ہوئے امید کرتا ہے کہ عالم امن و استحکام میں اقوام متحدہ اپنا کردار مزید بہتر بنائے گا۔
یو این آئی
