مالی میں فوجی کارروائی، 20 شدت پسند ہلاک

شدت پسندوں نے صبح سویرے موپتی کے وسطی علاقہ میں کیمپ پر گھات لگاکر حملہ کیا۔ اس کے بعد فرانسیسی قیادت والے برخانے مشن کی فوج کی جانب سے مدد یافتہ مالی کے سلامتی دستوں اور دہشت گردوں کے مابین تقریباً ایک گھنٹے تک لڑائی ہوئی۔

فوج نے اپنے بیان میں کہا کہ مالی کی فوج اور برخانے مشن کی مشترکہ کوششوں سے تقریباً 20 شدت پسندوں کو ہلاک کیا گیا اس دوران کئی موٹر سائکلز اور ایک بکتر بند گاڑی بھی تباہ کی گئی۔

تصادم میں 9 فوجیوں کی بھی موت ہوگئی جبکہ چھ دیگر زخمی ہوئے۔ تمام زخمیوں کو اسپتال میں داخل کرایا گیا ہے۔

ساہیل علاقہ میں شدت پسندوں کے خطرے کو روکنے کے لیے فرانس نے 2014 میں برخانے آپریشن شروع کیا تھا۔ آپریشن میں فرانسیسی افواج کے علاوہ جی 5 ساہیل کے رکن ممالک مالی، نائجر، برکینا فاسو، چاڈ اور موریتانیہ کے فوجی شامل ہیں۔