Condemnation on Kashmiri Pandit Killing شوپیاں میں پنڈت کی ہلاکت پر سیاسی سماجی و مذہبی رہنماؤں کی مذمت

سرینگر:جنوبی کشمیر کے شوپیاں ضلع میں مشتبہ عسکریت پسندوں نے ایک کشمیری پنڈت پر گولیاں برسا کر اسے شدید زخمی کر دیا۔ ذرائع کے مطابق یہ واقعہ شوپیاں ضلع کے چودھری گنڈ علاقے میں پیش آیا۔ کشمیری پنڈت کو فوری طور زخمی حالت میں نزدیکی اسپتال پہنچایا گیا جہاں وہ زخموں کی تاب نہ لا کر فوت ہو گیا۔ Militants fired upon Kashmiri Pandit

نیشنل کانفرنس کے نائب صدر اور سابق وزیر اعلیٰ عمر عبداللہ نے شوپیاں میں کشمیری پنڈت کی مشتبہ جنگجوؤں کے ہاتھوں ہلاکت کی مذمت کی ہے۔عمر عبداللہ نے اس واقعے کی مذمت کرتے ہوئے اپنے ایک ٹویٹ میں کہا کہ ایک اور قابل مذمت حملہ، میں واضح طور پر اس حملے کی مذمت کرتا ہوں جس میں پورن کرشن بٹ اپنی جان سے ہاتھ دھو بیٹھے‘۔ میں پسماندگان کو تعزیت پیش کرتا ہوں اور پورن جی کے روح کے سکون کے لئے دعا گو ہوں‘۔

عمر عبداللہ ٹویٹ

جموں وکشمیر پیپلز کانفرنس نے واقعے کی مذمت کرتے ہوئے اپنے ایک ٹویٹ میں کہا کہ ’شوپیاں کے چودھری گنڈ میں پورن کرشن بٹ پر حملے جس میں ان کی جان چلی گئی، کی ہم شدید مذمت کرتے ہیں۔ایسے حملوں کا کسی بھی صورت میں کوئی جواز نہیں ہے‘۔

پیپلز کانفرنس ٹویٹ

دریں اثنا سی پی آئی (ایم) کے سینئر لیڈر محمد یوسف تاریگامی نے اپنے ایک ٹویٹ میں کہاکہ پورن کرشن بٹ پر ہوئے حملے جس سے ان کی زندگی چراغ بجھ گیا، سے پہنچنے والے تکلیف کو الفاظ میں بیان کرنے سے قاصر ہوں‘۔

تاریگامی ٹویٹ

انہوں نے ٹویٹ میں کہا کہ ’عام شہریوں کی ہلاکتوں میں کوئی ٹھہراؤ نظر نہیں آ رہا ہے حکومت کو اقلیتی فرقے کے لوگوں کی فول پروف سیکورٹی کو یقینی بنانا چاہئے‘۔کانگریس کے سینئر لیڈر اور سابق مرکزی وزیر پروفیسر سیف الدین سوز نے شوپیاں میں کشمیری پنڈت کی ہلاکت پر اپنے گہرے دکھ اور صدمے کا اظہار کرتے ہوئے اسے قابل افسوس واقع قراردیا۔اُن کا کہنا ہے کہ یہ قتل انسانیت کے خلاف ہے لہذا اس کی جتنی بھی مذمت کی جاے کم ہے۔سابق مرکزی وزیر نے مزید کہاکہ اس واقعے کو لے کر پورے جموں وکشمیر میں غم کا ماحول چھایا ہوا ہے۔انہوں نے انتظامیہ پر زور دیا ہے کہ وہ اس طرح کے بہیمانہ واقعات کو روکنے کی خاطر سنجیدہ نوعیت کے اقدامات اُٹھائیں تاکہ آئندہ ایسے واقعات پر قد غن لگ سکیں۔

وہیں صدر انجمن شرعی شیعان آغا سید حسن الموسوی نے چوہدری گنڈ شوپیاں میں کشمیری پنڈت پورن کرشن بھٹ کے نامعلوم مسلح افراد کے ہاتھوں قتل کی شدید مذمت کی ہے۔ انہوں نے کہا کہ غیر مسلح انسانوں کا قتل تمام مذاہب خصوصاً اسلام کے ماننے والوں کے خلاف ہے۔ مہذب معاشرے میں تشدد کی کوئی گنجائش نہیں ہے۔
آغا سید حسن نے حکومت پر زور دیا ہے کہ اس گھناؤنے جرم میں ملوث مجرموں کی نشاندہی کرکے انہیں عبرت ناک سزا دی جائے۔ انہوں نے کہا کہ نہتے انسانوں کے قاتل کبھی بھی کشمیریوں کے خیر خواہ نہیں ہو سکتے جو فطرت اور یقین دونوں لحاظ سے امن پسند لوگ ہیں۔آغا سید حسن الموسوی نے کرشن کمار کے سوگوار خاندان کے ساتھ دلی ہمدردی کا اظہار کیا ہے۔