مرکز کے زیر انتظام جموں وکشمیر کی گرمائی راجدھانی سرینگر میں پیپلز ڈیمو کریٹک پارٹی کی طرف سے موجودہ انتظامیہ کے خلاف جم کر احتجاجی مظاہر کیے گئے۔ پارٹی کے جنرل سیکریٹری غلام نبی لون ہانجورہ کی قیادت میں پارٹی ہیڈ کوارٹر میں یہ احتجاجی مظاہرہ کیا گیا، جس میں مختلف اضلاع کے لیڈروں اور کارکنان نے اس میں حصہ لیا۔
مظاہرین نے انتظامیہ کے خلاف ہاتھوں میں پلے کارڈ لیے ہوئے مہنگائی ختم کرو اور پریس کی آزادی دو کے نعرے لگائے۔ وہیں پولیس نے مظاہرین کو آگے جانے کی اجازت نہیں دی۔
اس دوران میڈیا سے بات کرتے ہوئے غلام نبی لون ہانجورہ نے کہا کہ موجود بی جے پی کی حکومت نے مہنگائی کے تمام ریکارڈ توڑ دئیےہیں۔ یہ حکومت ہر طرح سے یہاں کے لوگوں کا استحصال کررہی ہے۔ پریس کو تنگ کیا جارہا ہے۔ کشمیر میں کسی کو بھی اپنی بات رکھنے کی اجازت نہیں دی جارہی ہے، جو سراسر غنڈہ گردی ہے۔
