جموں وکشمیر اور لداخ کے اعلیٰ تعلیمی اداروں کی کارکردگی اور کام کاج سے متعلق تجزیاتی رپورٹ پر منبی کتاب" انیلیسز آف ایکریڈیشن آف یونین ٹریٹریز جموں وکشمیر اینڈ لداخ" کی رسم اجرائی منوج سنہا نے ایس کے آئی سی سی میں انجام دی ہے۔
رسم اجرائی انجام دینے کی تقریب منعقد کرنے میں نیشنل اسسمنٹ اینڈ ایکریڈیشن کونسل کو سنٹرل یونیورسٹی آف کشمیر کا تعاون رہا۔ اس خاص تقریب میں جموں وکشمیر کے ایل جی منوج سنہا نے مہمان خصوصی کے طور پر شرکت کی جب کہ این اے اے سی(نیک) اور اعلیٰ تعلیمی اداروں کے عہدیداران، ڈائریکٹر کالجز، مختلف کالجز کے پرنسپل صاحبان، صوبائی کمشنر کشمیر اور ڈائریکڑ سکمز صورہ کے علاوہ دیگر شخصیات نے بھی تقریب میں شرکت کی۔
اس موقع پر سنٹرل یونیورسٹی کشمیر کے رجسٹرار پروفیسر محمد افضل زرگر نے نظامت کے فرائض انجام دیے جب کہ یونیورسٹی کے وائس چانسلر نے مہمانوں کا استقبال کیا۔
اس موقع پر ایل جی منوج سنہا نے اپنے خطاب میں کہا کہ نیک (naac) کی جانب سے کتاب کی صورت میں پیش کی گئی اس تجزیاتی رپورٹ نے نہ صرف جموں وکشمیر کے اعلیٰ تعلیمی اداروں میں مزید بہتری لانے کی گنجائش پیدا کی ہے بلکہ جدید تقاضوں کے عین مطابق طلباء کو بہتر سہولیات فراہم کرنے کے حوالے سے ضروریات کو بھی اجاگر کیا ہے۔
کشمیر اور جموں یونیورسیٹی کے اے پلس زمرے میں آنے پر منوج سنہا نے خوشی کا اظہار کرتے ہوئے کہا کہ ملک کی باقی یونیورسٹیز اور کالجوں کی طرح یہاں بھی اگرچہ تمام کورسز کرائے جارہے ہیں۔ تاہم انہوں نے اعلیٰ تعلیمی معیار کو مزید بڑھانے، تکنیکی تعلیم پر توجہ مرکوز کرنے اور بنیادی ڈھانچے میں بہتری لانے پر عہدیداران پر زور دیا، تاکہ معیار اور سہولیات کے اعتبار سے یہاں کی یونیورسٹیاں اور کالجز بھی ملک کے دیگر تعلیمی اداروں کے ہم پلہ بنیں۔
تقریب میں موجود نیک (naac) کے اعلیٰ عہدیداران نے بھی خطاب کیا جب کہ سنٹرل یونیورسٹی کشمیر کے وائس چانسلر پروفیسر معراج الدین نے یونیورسٹی کے کام کاج اور دستیاب سہولیات اور کورسز سے متعلق حاضرین کو جانکاری دی۔
مزید پڑھیں:کالج طلباء، تدریسی اورغیرتدریسی عملے کو خاص ٹیکہ کاری مہم میں لایا جارہا ہے: منوج سنہا
اس موقع پر ایل منوج سنہا نے اعلان کیا کہ تیکنیکی تعلیم کو فروغ دینے کی خاطر بارہمولہ اور جموں میں دو مراکز جلد قائم کئے جارہے ہیں۔
