بابائے قوم مہاتما گاندھی کے پڑپوتے تُشار گاندھی نے مرکزی حکومت پر الزام عائد کیا ہے کہ وہ تفریق کی پالیسی سے ملک کو تقسیم کرنے کی کوشش کر رہی ہے۔
مسٹر گاندھی نے راجستھان میں الور کے بھیکم پورہ میں منعقد ایک پروگرام کے بعد صحافیوں سے بات چیت میں مرکزی حکومت پرتنقید کرتے ہوئےکہا کہ یہ لوگ گاندھی کے نام کا غلط استعمال کر رہے ہیں۔ انھیں مارنے کے بعد ان سے عقیدت کا اظہار کر رہے ہیں۔ یہ بہت آسان ہے، لیکن یہ گاندھی کو سمجھتے نہیں ہیں۔
انہوں نے کہا کہ' گاندھی جی نے کہا تھا کہ تقسیم کے بعد اگر پاکستان سے کوئی بھی ستم رسیدہ خواہ مسلمان ہو یا کسی دوسرے مذہب اور طبقے کا ہو، وہ بھارت آ سکتا ہے لیکن یہ لوگ بڑی عیاری سے چنندہ الفاظ کا استعمال کرکے ملک کو تقسیم کرنے کا کام کر رہے ہیں۔
شہریت ترمیمی قانون کی تحریک کا ذکر کرتے ہوئے انہوں نے کہا کہ ملک میں گنگا جمنی تہذیب ہے اور ایک بڑا طبقہ اسے مانتا ہے۔
انہوں نے نوجوان طبقے سے اپیل کرتے ہوئے کہا کہ سی اے اے کی مخالفت میں بڑھ چڑھ کر حصہ لیں۔ انہوں نے سی اے اے کو آزاد بھارت کا سب سے خطرناک قانون قرار دیتے ہوئے کہا کہ یہ پہلا قانون ہے جو ملک کو تقسیم کرنا چاہتا ہے۔
انہوں نے مزید کہاکہ' یہ آئین کے خلاف آئیڈیالوجی ہے۔ اس قانون کے بننے کے بعد ملک کا کوئی مطلب نہیں رہ جاتا۔ یہ لو گ ملک کو توڑنا چاہتے ہیں۔ ملک کوئی زمینی شکل نہیں ہے۔ ملک میں اتحاد، استعداد اور انصاف ہونا چاہیے لیکن جس طریقے سے حکومت کام کر رہی ہے اس سے تینوں ہی چیزوں پر خطرہ ہے۔
مسٹر گاندھی نے کہا کہ اس کے خلاف 'ستیہ گرہ' بھی کیا جا سکتا ہے اور یہ کام بڑے سطح پر مرحلہ وار طریقے سے کرنا ہے۔
مزید پڑھیں: کلدیپ سینگر ہائی کورٹ سے رجوع
انہوں نے کہا کہ جس ملک کا تصور گاندھی جی نے کیا تھا، اسے بچانا ہے۔ اس قانون سے ایک طبقہ مطمئن نہیں ہے اور بڑی تعداد میں عوام اس کی مکمل مخالفت کر رہے ہیں۔ ملک میں بڑھنے والی بے روزگاری اور تباہ ہوتی معیشت پر ان کی کوئی توجہ نہیں ہے۔ دراصل معیشت سے توجہ ہٹانے کے لیے اس طرح کے قوانین لائے جا رہے ہیں۔
