میونسپل کارپوریشن کے 2022 میں ہونے والے عام انتخابات میں ایک رکنی(سنگل وارڈ) ہوں گے ۔ الیکشن کمیشن نے آئندہ برس 2022 میں ریاست کی جن میونسپل کارپوریشنوں کی میعاد ختم ہورہی ہے وہاں کے میونسپل کمشنرس کو مکتوب روانہ کیا ہے ۔
2022 میں مہاراشٹر کے برہن ممبئی میونسپل کارپوریشن ،الہاس نگر ،بھیونڈی۔ نظام پور، پنویل، میرا بھائندر، پمپری۔ چنچوڑ، پونہ، شولاپور، ناندیڑ واگھالہ شہر میونسپل کارپوریشن، ناسک، مالیگاؤں، پربھنی، لاتور، امراوتی، اکولہ، چندرپور اور ناگپور کی میعاد ختم ہورہی ہے۔ یہاں پر آئندہ سال کارپوریشن کے عام انتخابات ہونے جارہے ہیں۔ ریاستی حکومت نے مہاراشٹر ایکٹ نمبر 36 میں 31 دسمبر 2019 کو ترمیم کرتے ہوئے فیصلہ لیا تھا کہ ریاست کے تمام میونسپل کارپوریشنوں میں کثیر رکنی وارڈ کے بجائے یک رکنی وارڈ سسٹم نافذ کیا جائے گا۔ اسی کے مطابق اب یک رکنی وارڈ ہوگا۔
یہ بھی پڑھیں:
شیوسینا رکن اسمبلی نے نارائن رانے کو جان سے مارنے کی دھمکی دی
الیکشن کمیشن نے وارڈوں کی منصوبہ بندی کی ہدایت بھی متعلقہ کمشنرز کو دی ہے۔ اس کے مطابق اب میونسپل کارپوریشن کے آئندہ سال 2022 میں ہونے والے عام انتخابات میں اب سنگل وارڈ بنایا جائے گا، جہاں سے صرف ایک ہی کارپوریٹر منتخب ہوگا جبکہ سابقہ دور میں ایک زون سے چار نمائندے منتخب کئے جاتے تھے اور ووٹرس کو چار ووٹ دینا پڑتا تھا۔ اب نئے ترمیم شدہ قانون کے مطابق ووٹر کو ایک ہی ووٹ دینا ہوگا اور ایک وارڈ(زون) سے ایک ہی نمائندہ منتخب ہوگا۔
