بھونیشور: مرکزی تفتیشی بیورو (سی بی آئی) نے اوڈیشہ کے بہناگا میں 2 جون کو ہونے والے ہولناک ٹرین حادثے کی تحقیقات کرتے ہوئے حادثے کے دن ڈیوٹی پر موجود کچھ ریلوے ملازمین کے فون ضبط کر لیے ہیں۔ اوڈیشہ ٹرین حادثے میں اب تک 288 افراد کی جان گئی ہے اور ایک ہزار سے زائد زخمی ہوئے ہیں۔ ذرائع نے بتایا کہ سی بی آئی کی ٹیم نے فارنسک اور تکنیکی ٹیم کے ساتھ مین لائن، لوپ لائن کی جانچ کی اور کچھ ملازمین کے موبائل فون ضبط کر لیے جو حادثے کے دن ڈیوٹی پر تھے۔ ٹیم اپنی تحقیقات کے دوران ملازمین کے کال ریکارڈ، واٹس ایپ کالز، پیغامات اور سوشل میڈیا کے استعمال کی جانچ کر سکتی ہے۔
سی بی آئی کی ٹیم بدھ کو بہناگا بازار ریلوے اسٹیشن پہنچی اور تقریباً 45 منٹ تک حادثے کی تحقیقات کی۔ ٹیم نے منگل کو مین لائن، لوپ لائن، سگنل روم اور کنٹرول روم کا دورہ کیا اور کچھ عہدیداروں سے بات چیت کی۔ ریلوے بورڈ کی سفارش پر سی بی آئی اس واقعہ کی جانچ کر رہی ہے۔ سی بی آئی کے علاوہ ریلوے سیفٹی کمیشن بھی حادثے کی تحقیقات کر رہا ہے۔
دریں اثنا، اوڈیشہ کانگریس لیجسلیچر پارٹی کے لیڈر نرسمہا مشرا نے بہناگا ٹرین حادثہ کی سی بی آئی جانچ کے لئے ریلوے کے وزیر اشونی وشنو پر حملہ کیا ہے۔ انہوں نے نامہ نگاروں کو بتایا کہ سی بی آئی جانچ کا حکم صرف لوگوں کو گمراہ کرنے اور تباہ کن حادثے سے ان کی توجہ ہٹانے کے لیے دیا گیا ہے۔ حادثے کے لیے وشنو کو ذمہ دار ٹھہراتے ہوئے انہوں نے ان کے استعفیٰ کا مطالبہ کیا۔
یہ بھی پڑھیں:
دریں اثنا، ایسٹ کوسٹ ریلوے نے اپنے پیاروں کی لاشوں کی تلاش کرنے والے لوگوں کو مشورہ دیا ہے کہ وہ صرف بھونیشور میں آل انڈیا انسٹی ٹیوٹ آف میڈیکل سائنسز (ایمس) جائیں، جہاں لاشوں کو شناخت کے لیے رکھا گیا ہے۔ ریلوے ذرائع نے بتایا کہ ایمس اب واحد اسپتال ہے جہاں بہناگا ٹرین حادثہ کے متاثرین کے رشتہ داروں کو لاشوں کی شناخت کے لیے پہنچنا ہے۔ انہیں کسی دوسرے اسپتال جانے کی ضرورت نہیں ہے۔
ریلوے ذرائع نے بتایا کہ پہلی مال گاڑی کے بعد این ایم ایس ایل آج صبح بہناگا بازار اسٹیشن پر ڈاؤن لوپ لائن سے گزری۔ مرکزی وزیر بشویشور ٹوڈو نے بدھ کے روز کٹک کے ایس سی بی میڈیکل کالج اور اسپتال میں مریضوں سے بات چیت کی اور ان کی صحت کی حالت کا جائزہ لیا۔
ایمس کے ذرائع نے بتایا کہ کیپٹل ہاسپٹل، ایس یو ایم ہاسپٹل، کے آئی ایم ایس ہاسپٹل، ہائی ٹیک اور اے ایم آر آئی ہاسپٹل سے لائی گئی 39 سے زیادہ لاشوں کو فریج میں رکھے گئے کنٹینروں میں رکھا گیا ہے۔ ایمس کو اب تک 162 لاشیں موصول ہوئی ہیں جن میں سے 71 کو ان کے لواحقین کے حوالے کر دیا گیا ہے۔ (یو این آئی)
