پی ڈی پی کی صدر محبوبہ مفتی منی لانڈرنگ کے معاملے میں جمعرات کو انفورسمنٹ ڈائریکٹوریٹ (ای ڈی) کے سامنے پیش ہوئیں۔
قبل ازیں ذرائع نے بتایا تھا کہ محبوبہ مفتی جمعرات کو اپنے سرینگر کے دفتر میں ای ڈی کے سامنے پیش ہوں گی، جہاں ان سے پوچھ گچھ کی جائے گی۔
پی ڈی پی صدر پیر کے روز دہلی میں ایجنسی کے سامنے پیش نہیں ہوئی تھیں۔ ان کا کہنا تھا کہ ان کی کچھ اپائنٹمنٹز (ضروری کام) ہیں جو رد نہیں کیے جا سکتے ہیں۔
ذرائع نے بتایا کہ انہوں نے ای ڈی کے عہدیداروں سے درخواست کی تھی کہ وہ ان سے سرینگر میں پوچھ گچھ کریں نہ کہ دہلی میں اور ان کی درخواست قبول کر لی گئی۔
جموں و کشمیر کی خصوصی حیثیت کو ختم کرنے کے بعد حراست میں ایک سال سے زائد عرصے تک رہنے کے بعد رہا ہونے والی 61 سالہ رہنما کو قومی دارالحکومت میں ای ڈی ہیڈ کوارٹر میں پیش ہونے کے لئے نوٹس دیا گیا تھا۔
واضح رہے کہ گزشتہ 19 مارچ کے روز دہلی ہائی کورٹ نے منی لانڈرنگ کیس میں ای ڈی کے ذریعہ جموں و کشمیر کی سابق وزیر اعلی محبوبہ مفتی کو جاری کیے گئے سمن پر روک لگانے سے انکار کر دیا تھا۔
