جھارسوگوڑا: مرکزی وزیر تعلیم دھرمیندر پردھان نے اتوار کو اوڈیشہ کے وزیر اعلی نوین پٹنائک پر ریاست میں انتشار کی سرپرستی کرنے کا الزام لگایا اور کہا کہ ریاست سماج دشمن عناصر اور خوفناک مجرموں کے لیے محفوظ پناہ گاہ بن گئی ہے۔کولابیرا میں 10 مئی کو ہونے والے جھارسوگوڈا اسمبلی ضمنی انتخاب کے لیے پارٹی کے امیدوار تنکدھر ترپاٹھی کی حمایت میں ایک ریلی سے خطاب کرتے ہوئے دھرمیندر پردھان نے کہا کہ ایک کابینی وزیر نابا داس کو ڈیوٹی پر موجود پولیس افسر نے ہلاک کر دیا تھا۔ وزیر اعلیٰ کو اس بات کا جواب دینا ہوگا کہ انہیں (داس) کو کس نے اور کیوں مارا تھا۔ انہوں نے کہاکہ 'پوری ریاست میں خاص طور پر جھارسوگوڑا میں انارکی پھیلی ہوئی ہے۔ مجھے شک ہے کہ کیا نوین پٹنائک کو معلوم ہے کہ ریاست میں کیا ہو رہا ہے۔'
انہوں نے مزید کہا کہ 'وزیر اعلیٰ کے پاس کابینہ کے وزراء اور ایم ایل اے سے ملنے کا وقت نہیں ہے۔ جہاں تک مجھے معلوم ہے ریاست کے نئے چیف سکریٹری اپنی تقرری کے بعد سے وزیر اعلیٰ سے ملاقات نہیں کر پائے ہیں۔ بالواسطہ طور پر ایک بیوروکریٹ کی طرف اشارہ کرتے ہوئے انہوں نے کہا کہ یہ واضح ہے کہ ریاست پر کون حکومت کر رہا ہے اور کس طرح حکمرانی کی جا رہی ہے۔انہوں نے الزام لگایا کہ ریاستی حکومت سنٹرل اینڈ ڈسٹرکٹ مائننگ فنڈ (ڈی ایم ایف) فنڈز کا بڑے پیمانے پر غلط استعمال کر رہی ہے اور عوام کو مرکزی فنڈ کا فائدہ مشکل سے مل رہا ہے۔
یواین آئی
