مدھیہ پردیش میں عید میلاد النبیﷺ کے موقع پر ہنگامہ

دھار نامی علاقہ میں جشنِ عید میلادُالنبی کے موقع پر اس وقت ہنگامہ ہوگیا جب میلادالنبی کے موقع پر انتظامیہ کی جانب سے جاری کردہ رہنمایانہ خطوط کے برعکس دوسرے راستوں سے جلوس نکالنے کی کوشش کی جارہی تھی۔

ریاست مدھیہ پردیش کے دھار نامی علاقہ میں عید میلاد النبیﷺ کے موقع پر جلوس نکالنے کو لے کر ہنگامہ ہوگیا۔ دراصل جلوس نکالنے کے پیش نظر انتظامیہ کی جانب سے جو ہدایات اور رہنمایانہ خطوط جاری کئے گئے تھے اس کے برعکس جلوس کو دوسرے راستے سے نکالنے کی کوشش کی جارہی تھی۔

پولیس نے بیرئیر لگاکر جب جلوس کو روکنے کی کوشش کی تو پولیس اور جلوس میں شامل افراد کے درمیان بحث شروع ہوگئی۔ پولیس نے صورتحال پر قابو پانے کے لئے لاٹھی چارج کیا۔

واضح رہے کہ دھار علاقہ میں عید میلاد النبیﷺ کے موقع پر جلوس نکالنے کی روایت رہی ہے۔ رواں برس انتظامیہ نے کورونا وائرس کے پیش نظر محدود پیمانہ پر جلوس نکالنے کی اجازت دی تھی۔