جموں و کشمیر کے ضلع بارہمولہ کے کنظر علاقے میں ایک مادہ ریچھ اپنے دو بچوں سمیت انسانی بستی میں داخل ہوگئی جس کے بعد اسے دیکھنے کے لیے لوگوں کی بھیڑ جمع ہوگئی۔
ایک مقامی شخص نے کہا کہ 'لوگوں نے جب جنگلی جانور کی آواز سنی تو آس پاس ہزاروں کی تعداد میں لوگ جمع ہوگئے۔ لوگوں نے ریچھ کو بھگانے کے لیے اس پر پتھراؤ کیا جس کے بعد وہ بھاگ گئی۔ اس بیچ اس کے دو بچے بستی میں ہی رہ گئے۔'
مقامی لوگوں نے پولیس اور وائلڈ لائف محکمہ کو اس معاملے کی اطلاع دی جس کے بعد محکمہ وائلڈ لائف کے عہدیدار موقع پر پہنچے اور اس کے دو بچوں کو پکڑ لیا۔
وہیں لوگوں کو اس بات کا بھی ڈر ستا رہا ہے کہ کہیں ان دو بچوں کے لیے وہ واپس بستی میں نہ آئے جس سے کہ انسانی جانوں کو خطرہ لاحق ہوسکتا ہے۔
لوگوں نے انتظامیہ سے گزارش کی ہے کہ وہ بستی میں محکمہ وائلڈ لائف کے ملازمین کو تعینات کریں تاکہ انہیں تحفظ مل سکے۔
