اننت ناگ: جنوبی ضلع اننت ناگ میں عسکریت پسندوں نے غیر مقامی مزدوروں پر فائرنگ کی جس کے نتیجے میں دو مزدور زخمی ہوگئے۔ ذرائع کے مطابق حملے کے بعد سکیورٹی فورسز نے آس پاس علاقوں کو محاصرے میں لے کر بڑے پیمانے پر تلاشی آپریشن شروع کیا۔ پولیس کے ایک ترجمان نے ٹویٹ کے ذریعے جانکاری دیتے ہوئے بتایا کہ جنوبی ضلع اننت ناگ میں ملی ٹینٹوں نے منگل دیر شام غیر مقامی مزدوروں پر فائرنگ کی جس کے نتیجے میں دو مزدور زخمی ہوگئے۔ دونوں زخموں کو فوری طور پر گورنمنٹ میڈیکل کالج اننت ناگ میں علاج ومعالجہ کے لیے داخل کیا گیا۔
انہوں نے بتایا کہ ہسپتال میں دونوں کی حالت مستحکم بتائی جارہی ہے۔ دریں اثنا سکیورٹی فورسز نے آس پاس علاقوں کو محاصرے میں لے کر مفرور عسکریت پسندوں کی بڑے پیمانے پر تلاش شروع کی۔ پورے علاقے کی گھیرابندی کر کے داخلی و خارجی راستوں پر پہرے بٹھا دیے گئے ہیں۔ اس سلسلے میں متعلقہ دفعات کے تحت ایک کیس بھی درج کر گیا ہے اور پورے معاملے کی جانچ جاری ہے۔
زخمی مزدوروں کی شناخت 20 سالہ اکشے ولد کانتا اور 20 سالہ سورو ولد پردیپ کے طور پر کی گئی ہے۔ دونوں مہاراشٹر کے سانگلی کے رہنے والے ہیں۔ وہیں اندازہ لگایا جا رہا ہے حملہ آور رات کے اندھیرے کا فائدہ اٹھا کر فرار ہونے میں کامیاب ہو گئے۔
مزید پڑھیں: Protest against Shopian Firing غیر ریاستی مزدوروں پر فائرنگ، شوپیاں میں احتجاج
واضح رہے کہ جمعے کی شام کو گاگرن شوپیاں میں مشتبہ ملی ٹینٹوں نے بہار سے تعلق رکھنے والے مزدوروں پر فائرنگ کی جس کے نتیجے میں تین مزدور شدید طورپر زخمی ہوئے تھے۔جنوبی کشمیر میں ملی ٹینٹوں کے ہاتھوں غیر مقامی مزدوروں پر حملوں کے پیش نظر سکیورٹی کے غیر معمولی انتظامات کیے گئے ہیں۔
