بانڈی پورہ: شمالی کشمیر کے ضلع بانڈی پورہ کے نائدکھے سوناواری علاقے میں عام آدمی پارٹی جموں وکشمیر کا ایک اجلاس منعقد ہوا جس کے دوران سوناواری سے تعلق رکھنے والے زن و مرد کی ایک اچھی تعداد نے حصہ لیا اور پارٹی کے لئے ایک ممبر شپ ڈرائیو کا آغاز کیا گیا۔ اس موقع پر عام آدمی پارٹی جموں وکشمیر کے کنوینر ناصر علی کوچک موجود تھے اور ان کے ساتھ کئی دیگر عہدیداران بھی اجلاس میں موجود رہے۔
اجلاس کے دوران خطاب میں کئی مقررین نے لوگوں کو عام آدمی پارٹی سے جڑنے کی دعوت دی اور ان سے اس بات کا وعدہ کیا گیا کہ اگر مستقبل میں عام آدمی جموں وکشمیر میں ابھر کر سامنے آئی تو نئی دہلی کے طرز پر یہاں بھی تعلیم، بجلی، پانی، سڑکیں اور طبی وسائل کو بہتر بنانے کے علاوہ نوجوانوں کو روزگار اور خواتین کو با اختیار بنانے کے لئے کوشش کی جائے گی۔
عام آدمی پارٹی کشمیر کے کنوینر ناصر علی کوچک نے کہا کہ انہوں نے کشمیر کے لئے ایک اچھی حکمرانی کا ماڈل تیار کیا ہے اور اگر آم آدمی پارٹی کو یہاں سپورٹ ملا تو اس پر عمل درآمد کیا جائے گا اور مذکورہ وعدوں کو پورا کرنے کے لئے کوششیں کی جارہی ہیں۔ اقتدار میں آنے کے بعد اس پر عمل درآمد کیا جائے گا۔
