حادثہ اس وقت پیش آیا جب ایک کار ڈرائیور کار چلاتے وقت سو گیا اور کار مخالف سمت سے آنے والی دوسری تیز رفتار کار سے ٹکرا گئی۔ اس حادثہ میں دو افراد کی موت ہوگئی جبکہ دو دیگر شدید زخمی ہوگئے جنہیں کریم نگر ہسپتال میں داخل کیا گیا ہے۔ ان کی حالت نازک ہے۔
پولیس نے مقام واقعہ سے ایک کلو سے زائد سونا ضبط کیا۔ کار کی پچھلی ڈکی سے تین بیگس برآمد ہوئے جن کو کھولنے پر کئی پیکٹس میں سونا اور کتابیں برآمد ہوئیں۔ پولیس نے ابتدائی طور پر ان افراد کو سونے کا تاجر بتایا ہے۔ مہلوک اور زخمی افراد ضلع گنٹور کے ساکن بتائے جارہے ہیں۔
سونے کے تاجر کوٹا رام بابو، کوٹا سرینواس، ان کے بہنوئی سنتوش اور دیگر ایک شخص کار میں بیلم پلی سے راما گنڈم جارہے تھے جب حادثہ پیش آیا۔ کار پلٹ گئی جس میں چار افراد پھنس گئے۔ رام بابو جو سونے کا تاجر ہے، اس کی اس وقت موت ہوگئی جب مقامی افراد اسے کار سے باہر نکالنے کی کوشش کررہے تھے جبکہ سرینواس کی ہسپتال لے جانے کے دوران راستہ میں موت ہوگئی۔
ڈرائیور سنتوش اور سرینواس کے بہنوئی سنتوش شدید زخمی ہوگئے اور انہیں کریم نگر ہسپتال میں داخل کیا گیا۔ مہلوکین کی لاشوں کو راما گنڈم کے ہسپتال میں رکھا گیا ہے۔ کار سے دیڑھ کلو سونا برآمد کیا گیا۔ قبل ازیں مقام واقعہ پر 108 ایمبولنس پہنچی تھی جس نے راما گنڈم پولیس کو سونا حوالے کیا۔ پولیس کا کہنا ہے کہ تیز رفتاری کے باعث حادثہ پیش آیا۔
