چنئی: آئی پی ایل 2024 میں چنئی کی کمان سنبھالنے والے نوجوان بلے باز رتوراج گائیکواڑ آئی پی ایل کی تاریخ میں سنچری بنانے والے چنئی کے پہلے کپتان بن گئے۔
انہوں نے منگل کو لکھنؤ سپر جائنٹس کے خلاف میچ میں ایم اے چدمبرم اسٹیڈیم میں 60 گیندوں پر 108 رنز کی ناٹ آوٹ اننگز کھیلتے ہوئے یہ کارنامہ انجام دیا۔
ڈومیسٹک سرکٹ میں مہاراشٹر کی نمائندگی کرنے والے رتوراج کی شاندار اننگز کی وجہ سے چنئی نے اسکوڑ بورڈ پر 210 رنز کا بڑا ہدف لگانے میں کامیاب رہا۔
پونے سے تعلق رکھنے والے گائیکواڑ، چنئی کے لیے سابق اوپنر مرلی وجے اور آسٹریلیائی شین واٹسن کے ساتھ سی ایس کے کے لیے متعدد سنچریاں بنانے والے تیسرے بلے باز بھی بن گئے۔ قابل ذکر بات یہ ہے کہ ٹورنامنٹ میں ان کی پہلی سنچری 2021 میں آئی جب انہوں نے راجستھان رائلز کے خلاف شاندار اننگز کھیلی۔
گائیکواڑ نے رواں سیزن میں اب تک آٹھ اننگز میں 58.16 کی اوسط اور 142.44 کے اسٹرائیک ریٹ کے ساتھ 349 رنز بنائے ہیں۔ وہ اس سیزن میں سی ایس کے کے لیے سب سے زیادہ رنز بنانے والے کھلاڑی ہیں اور مجموعی طور پر اسٹار بلے باز ویراٹ کوہلی کے پیچھے دوسرے نمبر پر ہیں۔
واضح رہے کہ آئی پی ایل 2024 کے سیزن کے آغاز سے قبل فرنچائز کی کپتانی لیجنڈری مہندر سنگھ دھونی سے رتوراج گائیکواڑ کو سونپی گئی تھی۔ دائیں ہاتھ کے بلے باز نے اب تک قائدانہ کردار کو کافی مؤثر طریقے سے نبھایا ہے جس نے ٹیم کو سات میچوں میں چار میں فتوحات دلائی ہیں۔
یہ بھی پڑھیں:
رتوراج گائیکواڈ چنئی کے نئے کپتان مقرر، ایم ایس دھونی کا کپتانی سے استعفیٰ
