پلوامہ (جموں کشمیر) : جہاں ایک طرف انتظامیہ سیاحت کو فروغ دینے کے حوالے سے سنجیدہ اقدامات کا دعویٰ کر رہی ہے وہیں جنوبی کشمیر کے ترال علاقے میں سیاحت کو فروغ دینے کے حوالہ سے کافی امکانات موجود ہیں جن کی جانب توجہ مبذول کرنے کی ضرورت ہے۔ ترال کے کئی مقامات بشمول پنر ڈیم، نارستان، آری پل اور شکارگاہ کو سیاحتی نقشہ پر لایا گیا ہے تاہم بدقسمتی سے وہاں بھی زمینی سطح پر خاطر خواہ کام نہیں ہوا ہے۔ جبکہ سب ضلع کے چنار باغ، گانگ، گنڈتل دودھ مرگ جیسے ابھرتے ہوئے سیاحتی مقامات کی عظمت رفتہ بحال کرنا وقت کی اہم ضرورت ہے جس کی جانب انتظامیہ کو توجہ دینی چاہئے۔
ٹاؤن ترال سے آٹھ کلومیٹر کی دوری پر واقع گنڈتل، دودھ مرگ گزشتہ برسوں سے ایک نیے پکنک سپاٹ Picnic Spotکے طور پر ابھر کر سامنے آ رہا ہے، جہاں عید کے مواقع پر ترال کے مختلف دیہی علاقوں سے لوگوں کی بڑی تعداد سیر سپاٹے کی غرض سے آتی ہے اور قدرت کے حسین نظاروں سے لطف اندوز ہو رہی ہے۔ تاہم مقامی لوگوں کا شکوہ ہے کہ اس ابھرتے ہوئے سیاحتی مقام میں بنیادی ڈھانچے کو مضبوط کرنے کے لیے اقدامات نہیں کیے جا رہے ہیں۔
منظور الہی نامی ایک مقامی شہری نے ای ٹی وی بھارت کے ساتھ بات کرتے ہوئے کہا کہ مقامی آبادی کی جانب سے بار بار گزارشات کیے جانے کے باوجود انتظامیہ اس جانب توجہ دینے سے گریزاں ہے۔ انہوں نے کہا کہ دودھ مرگ کو سیاحتی نقشے پر لائے جانے سے نہ صرف جموں و کشمیر کی مجموعی معیشت مستحکم ہوگی بلکہ یہاں کے باشندوں کو بھی روزگار کے مختلف مواقع فراہم ہوں گے۔
یہ بھی پڑھیں: Foriegn tourists visit Tral Narastan نارستان، ترال میں پہلی بار غیر ملکی سیاحوں کی آمد
محمد لطیف نامی ایک مقامی دکاندار کے مطابق لوگوں کی آمد سے ان کے کاروبار میں اضافہ ہو گیا ہے اور اگر صورتحال اسی طرح رہی تو یہ پسماندہ علاقہ ترقی کی راہ پر گامزن ہوگا۔ انہوں نے گنڈتل، دودھ مرگ کو سیاحتی نقشے پر لانے کے حوالے سے جموں کشمیر انتظامیہ کی جانب سے ٹھوس اور سنجیدہ اقدامات اٹھائے جانے کی امید ظاہر کی۔
