پلوامہ (جموں کشمیر): سرینگر پارلیمانی نشست کے لئے 13 مئی یعنی پیر کو ووٹ ڈالے جا رہے ہیں، جب کہ آج ہفتہ کو انتخابی مہم کا آخری دن ہے۔ تاہم جنوبی کشمیر کے پلوامہ ضلع میں دفعہ 144 نافذ کیے جانے کا بھی اعلان کیا گیا ہے۔ اس بیچ پیپلز ڈیموکریٹک پارٹی (پی ڈی پی) نے انتظامیہ کو تنقید کا نشانہ بناتے ہوئے پارٹی کے کارکنان کو گرفتار کرنے اور ہفتہ کی صبح سے ہی دفعہ 144 نافذ کرکے انہیں انتخابی مہم سے دور رکھنے کی سازش کا بھی الزام عائد کیا۔
پی ڈی پی کے ایک عہدیدار نے اس ضمن میں تفصیلات فراہم کرتے ہوئے کہا کہ ’’آج رات ضلع پلوامہ کے ابہمامہ علاقے سے تعلق رکھنے والا ارشاد احمد نام کے ایک پی ڈی پی پی کارکن کو گرفتار کیا گیا، ان کے علاوہ مزید نوجوانوں کو بھی حراست میں لیا گیا ہے۔‘‘ پی ڈی پی کے ان الزامات کی جموں کشمیر پولیس نے نہ تائید کی ہے اور نہ تردید۔
قابل ذکر ہے کہ لوک سبھا انتخابات کے تحت دیگر اضلاع کی طرح ضلع پلوامہ میں بھی تقریباً سبھی سیاسی جماعتوں کے ساتھ ساتھ آزاد امیدواروں نے بھی انتخابی مہم چلائی اور ووٹروں کو اپنی جانب راغب کرنے کی بھرپور کوشش کی۔ انتخابی مہم ضلع بھر میں پرامن رہی تاہم پی ڈی پی کی جانب سے انہیں انتخابی مہم ان کی مرضی کے مطابق انجام نہ دینے کے الزامات عائد کیے گئے ہیں۔ الیکشن کمیشن آف انڈیا کی ہدایت کے مطابق انتخابی مہم آج شام چھ بجے اختتام ہوگی جب کہ انتظامیہ نے ’’احتیاطی طور‘‘ ضلع پلوامہ میں آج شام سے دفعہ 144 نافذ کرنے کا اعلان کیا ہے تاہم محبوبہ مفتی کا دعویٰ ہے کہ ہفتہ کی شام کے بجائے ہفتہ کی صبح سے ہی دفعہ 144نافذ کی گیا تاکہ ان کے کارکنان تشہیری مہم انجام نہ دے سکیں۔
یہ بھی پڑھیں: پی ڈی پی کارکن کا پولیس نے تعاقب نہیں کیا: پلوامہ پولیس
