رملہ: غزہ میں بمباری کے ساتھ مقبوضہ مغربی کنارے میں بھی اسرائیلی فورسز کی جارحیت جاری ہے۔ عرب میڈیا کے مطابق فلسطینی اسیران اتھارٹی کا کہنا ہےکہ مقبوضہ مغربی کنارے میں اسرائیلی فورسز کا فلسطینیوں کے خلاف کریک ڈاؤن جاری ہے۔
اسیران اتھارٹی کے مطابق اسرائیلی فورسز نے مزید 15 فلسطینی گرفتار کر لیے، مقبوضہ مغربی کنارے میں 7 اکتوبر سے اب تک 7 ہزار 225 فلسطینیوں کو گرفتار کیا جاچکا ہے۔ اسیران اتھارٹی کا مزید کہنا ہےکہ گرفتار فلسطینیوں میں بچے اور اسرائیل حماس معاہدے کے تحت رہائی پانے والے بھی شامل ہیں۔
دوسری جانب غزہ میں اسرائیلی فوج کی جانب سے بےگھر فلسطینیوں کے خیموں پر ممنوعہ سفید فاسفورس کے گولوں کی بمباری جاری ہے۔ امداد کے منتظر فلسطینیوں پر گولہ باری سےکل سے اب تک مزید 100 سے زیادہ فلسطینی جاں بحق ہوگئے۔ جاں بحق فلسطینیوں کی کل تعداد 29,782 اور زخمیوں کی تعداد 70,043 تک پہنچ گئی ہے۔
ادھر عالمی عدالت انصاف میں فلسطینی سرزمین پر اسرائیل کے 57 سالہ قبضے کے خلاف سماعت میں عرب لیگ نے اسرائیلی قبضے کو بین الاقوامی انصاف کی توہین قرار دیا۔ عرب لیگ نمائندوں کا کہنا تھا کہ فلسطینی سرزمین پر قبضےکا کوئی قانونی و اخلاقی جواز نہیں، جنگل کا قانون خطے میں امن نہیں لاسکتا، اسرائیلی قبضےکا خاتمہ ہی امن کا ضامن ہے، اسرائیل فلسطینیوں کے خلاف نسلی تسلط کا ارتکاب کر رہا ہے۔ (یو این آئی)
یہ بھی پڑھیں: مغربی کنارے میں نئی فلسطینی حکومت غزہ جنگ کے لیے کیا معنی رکھتی ہے؟
