سینما کے جادوگر سنجے لیلا بھنسالی کو جنم دن مبارک

Happy Birthday Sanjay Leela Bhansali سنجے لیلا بھنسالی ہندی فلم انڈسٹری کے مشہور شخصیات میں سے ایک ہیں، وہ اپنی فنکاری سے شائقین کو ایک جادوئی سفر پر لے جاتے ہیں۔ بھنسالی ان چند بھارتی فلمسازوں میں سے ہیں جنہیں فلمسازی کے تمام پہلوؤں میں مہارت ہے۔جیسا کہ ہدایتکار آج اپنی 61 ویں سالگرہ منارہے ہیں، آئیے اس خاص موقع پر ان کے فلمی سفر پر ایک نظر ڈالے۔

ممبئی: معروف بالی ووڈ فلم ساز سنجے لیلا بھنسالی آج 61 برس کے ہوگئے۔24 فروری 1963 کو ممبئی میں پیدا ہونے والے سنجے لیلا بھنسالی نے اپنے کیریئر کا آغاز ودو ونود چوپڑا کے اسسٹنٹ کے طور پر کیا۔بھنسالی نے ودو ونود چوپڑا کی فلموں پرندا، 1942 اے لو اسٹوری اور قریب میں اسسٹنٹ ڈائریکٹر کے طور پر کام کیا۔

بطور آزاد ہدایت کار سنجے لیلا بھنسالی نے اپنے کیرئر کا آغاز 1996 میں ریلیز ہونے والی فلم خاموشی سے کیا۔ اس فلم میں نانا پاٹیکر، سلمان خان اور منیشا کوئرالہ نے مرکزی کردار ادا کیے تھے۔اگرچہ یہ فلم ٹکٹ کھڑکی پر کچھ خاص نہیں کر سکی، لیکن سنجے لیلا بھنسالی نے اپنی بہترین ڈائریکشن سے شائقین کے ساتھ ساتھ ناقدین کا بھی دل جیت لیا۔

سال 1999 میں ریلیز ہونے والی فلم "ہم دل دے چکے صنم "سنجے لیلا بھنسالی کے کیریئر کی پہلی سپر ہٹ ثابت ہوئی۔ اس فلم میں بھی سنجے لیلا بھنسالی نے سلمان خان کا انتخاب کیا۔ فلم میں سلمان خان کے علاوہ ایشوریہ رائے اور اجے دیوگن نے مرکزی کردار ادا کیے تھے۔ سلمان خان اور ایشوریہ رائے کی جوڑی کو شائقین نے بے حد پسند کیا۔ سنجے لیلا بھنسالی کو اس فلم کے لیے بہترین پروڈیوسر-ڈائریکٹر کے فلم فیئر ایوارڈ سے نوازا گیا۔

سن 2002 میں سنجے لیلا بھنسالی نے شرت چندر کے ناول پر مبنی فلم "دیوداس" کی ہدایت کاری کی, جس میں شاہ رخ خان نے دیوداس کا کردار ادا کیا۔ دیوداس میں شاہ رخ خان کے علاوہ ایشوریہ رائے اور مادھوری دکشت کے بھی اہم کردار تھے۔ اس فلم کے لیے انہیں بہترین ہدایت کار کا فلم فیئر ایوارڈ بھی دیا گیا۔

سال 2005 میں ریلیز ہونے والی فلم "بلیک" کا شمار سنجے لیلا بھنسالی کے کیرئیر کی اہم فلموں میں ہوتا ہے۔ اس فلم میں انہیں میگا اسٹار امیتابھ بچن اور رانی مکھرجی کی ہدایت کاری کا موقع ملا۔سنجے لیلا بھنسالی کو بلیک کے لیے بھی بہترین پروڈیوسر اور ڈائریکٹر کے فلم فیئر ایوارڈ سے نوازا گیا۔

دریں اثنا، سنجے لیلا بھنسالی نے 2007 میں سانوریہ اور 2010 میں گزارش کو پروڈیوس کیا اور ہدایت کاری کی، حالانکہ دونوں فلمیں ٹکٹ کھڑکی پر ناکام ثابت ہوئیں۔ سانوریہ کے ذریعے سنجے لیلا بھنسالی نے رنبیر کُپور اور سونم کپور کو فلم انڈسٹری میں لانچ کیا۔

سنجے لیلا بھنسالی کی فلم پدماوت سال 2018 میں ریلیز ہوئی تھی۔ یہ فلم باکس آفس پر سُپر ہٹ ثابت ہوئی۔ اس کے بعد بھنسالی نے سال 2022 میں عالیہ بھٹ کے ساتھ سپرہٹ فلم "گنگوبائی کاٹھیا واڑی" بنائی۔ ان دنوں بھنسالی ویب سیریز "ہیرامنڈی" بنا رہے ہیں۔
(یو این آئی)