نئی دہلی: سی بی آئی نے دہلی میں انسانی اسمگلنگ کرنے والے گروہ کا پردہ فاش کیا ہے۔ معلومات کے مطابق سی بی آئی نے جمعہ کی رات دہلی کے کئی علاقوں میں چھاپے مارے، جس میں گینگ کے کچھ ارکان کو گرفتار بھی کیا گیا۔ دوران تفتیش انکشاف ہوا کہ گینگ کے کارندے نومولود بچوں کو چرا کر صرف 50 ہزار روپے میں فروخت کر دیتے تھے۔
سی بی آئی کے چھاپے میں جن ملزمان کو پکڑا گیا ان میں سونی پت ہریانہ کا نیرج، مغربی وہار دہلی کی اندو پوار، دہلی کی پٹیل نگر کا اسلم، نارنگ کالونی دہلی کی پوجا کشیپ، کرالہ کی ریتو، مالویہ نگر کی رہنے والی انجلی اور دہلی کی کویتا شامل ہیں۔سی بی آئی کے چھاپے میں 8 بچے بھی برآمد ہوئے ہیں۔ ٹیم کے مطابق اس معاملے میں اسپتال کے وارڈ بوائے اور عملے کو بھی گرفتار کیا گیا ہے۔
انسانی اسمگلنگ کیس کی اطلاع ملنے پر سی بی آئی چھاپہ مارنے پہنچی تھی۔ اس دوران سی بی آئی کی ٹیم نے ایک گھر سے دو نوزائیدہ بچوں کو برآمد کیا۔ ابتدائی تفتیش میں اسے نومولود بچوں کی خرید و فروخت کا معاملہ سمجھا گیا۔ سی بی آئی کی ٹیم بچوں کو بیچنے والی خاتون اور انہیں خریدنے والے شخص سے پوچھ گچھ کر رہی ہے۔
کیشو پورم علاقہ کا معاملہ: سی بی آئی نے دہلی کے کیشو پورم تھانہ علاقہ میں انسانی اسمگلنگ کے معاملے میں چھاپہ مارا۔ سی بی آئی کی ٹیم نے چھاپے کے دوران ایک گھر سے دو نوزائیدہ بچے برآمد کیے ہیں۔ ابتدائی تحقیقات سے معلوم ہوا ہے کہ نومولود بچوں کا کاروبار کیا جا رہا تھا۔
معلومات اس طرح آئی: چائلڈ لفٹر کے سرگرم ہونے کی اطلاع ایک مخبر سے ملی، جس کی بنیاد پر سی بی آئی نے پولیس کے ساتھ کیشو پورم کی نارنگ کالونی میں چھاپہ مارا۔ اطلاع ملی کہ ایک خاتون گھر کے اندر بچے خرید کر بیچتی ہے۔ اس اطلاع کی بنیاد پر سی بی آئی کی ٹیم نے نارنگ کالونی کی گلی نمبر 9 میں چھاپہ مارا۔
معلومات کے مطابق، ملزم خاتون گزشتہ 10 ماہ سے کرائے پر نارنگ کالونی میں اس مکان میں رہ رہی تھی۔ مالک مکان اور آس پاس کے لوگوں کو اندازہ نہیں تھا کہ اسی گھر میں اتنا سنسنی خیز واقعہ پیش آیا ہے۔ مالک مکان کا کہنا ہے کہ وہ ایسی کسی چیز سے لاعلم تھا۔ پولیس موقع پر پہنچی تو آس پاس کے لوگوں نے انہیں اطلاع دی۔ پولیس نے گھر کے اندر سے بچوں کو برآمد کرلیا۔ پولیس نے ملزم خاتون اور بچہ خریدنے کے لیے آنے والے شخص کو گرفتار کر لیا ہے۔
