దుబాయ్ వేదికగా జరుగుతోన్న ఆసియన్ బాక్సింగ్ ఛాంపియన్షిప్స్ పోటీలు తుది అంకానికి చేరుకున్నాయి. పలువురు భారత బాక్సర్లు ఫైనల్స్ బరిలో నిలిచారు. స్వర్ణ పతకమే లక్ష్యంగా చివరి పోరులోనూ గెలవాలని భావిస్తున్నారు.
ఆరు సార్లు ప్రపంచ ఛాంపియన్ మేరీ కోమ్ బాక్సింగ్ పోటీల ఫైనల్స్కు చేరింది. 51 కేజీల విభాగంలో కజకిస్థాన్ బాక్సర్ నాజీమ్ కైజాయ్తో తలపడనుంది. ఇప్పటికే ఈ పోటీల్లో ఐదు సార్లు బంగారు పతకాలు గెలిచిన మేరీ.. మరో గోల్డ్ మెడల్ను తన ఖాతాలో వేసుకోవాలని యోచిస్తోంది.
గురువారం జరిగిన సెమీస్లో మంగోలియా బాక్సర్ లుట్సైఖాన్ అల్తాంట్‌సెట్సెగ్పై 4-1 తేడాతో గెలిచి ఊపుమీదుంది మేరీ. ఇక తుది పోరులో రెండు సార్లు ప్రపంచ ఛాంపియన్ అయినా కైజాయ్ వంటి గట్టి ప్రత్యర్థితో పోరుకు సై అంటోంది.
మేరీ కోమ్తో పాటు బాక్సర్లు పూజా రాణి, అనుపమ, లాల్బుత్సాహిలు ఆదివారం జరిగే ఫైనల్స్లో తమ అదృష్టాన్ని పరీక్షించుకోనున్నారు.
ఇదీ చదవండి: ఒలింపిక్స్ శిక్షణ కోసం పుణెకు మేరీకోమ్
ఇక పురుషుల విభాగంలో డిఫెండింగ్ ఛాంపియన్ అమిత్ పంగాల్(52 కేజీ), శివ థాప(64 కేజీ), సంజీత్(91 కేజీ).. సోమవారం జరిగే ఫైనల్స్లో పాల్గొనడానికి ఆత్రుతగా ఎదురుచూస్తున్నారు.
అమిత్ పంగాల్ తన చివరి పోరులో ఉజ్బెకిస్థాన్ బాక్సర్ జోయిరోవ్ షాఖోబిడిన్తో అమీతుమీ తేల్చుకోనున్నాడు. మరో బాక్సర్ శివ థాప.. మంగోలియా ప్లేయర్ బాతర్సుఖ్ చిన్జోరిగ్తో తలపడనున్నాడు. ఇక రెండో సీడ్ ఆటగాడు సంజీత్.. కజకిస్థాన్ బాక్సర్ వాసిలీ లెవిట్తో పోటీ పడనున్నాడు.
2019 ఆసియన్ బాక్సింగ్ ఛాంపియన్షిప్స్ పోటీల్లో 13 మెడల్స్ కొల్లగొట్టిన భారత్.. ఈ సారి ఆ సంఖ్యను మరింత పెంచారు. ఇప్పటికే 15 పతకాలు ఖాయం చేసుకున్నారు.
ఇదీ చదవండి: శివ థాపా.. టైసన్ను చూసి పంచ్లు నేర్చి!
