ఈ సారి టీ20 వరల్డ్ కప్ రసవత్తరంగా సాగుతోంది. పసి కూనలని తేలికగా తీసుకున్న జట్లు మహామహులని ఓడిస్తున్నాయి. ఫామ్లో లేరన్న ప్లేయర్లు బంతుల్ని బౌండరీలు దాటిస్తున్నారు. ఇక ఫామ్లో ఉన్న వారు ఆ స్థాయిలో ఆడలేక వెనుదిరుగుతున్నారు. ఇకపోతే ఈ టోర్నీలో గతసారి భారత్కు పట్టుకున్న ఈ సారి పాకిస్థాన్కు పట్టినట్లు కనిపిస్తోంది. అదెలాగంటే..
ఆస్ట్రేలియా వేదికగా జరుగుతున్న టీ20 వరల్డ్ కప్లో వరుసగా రెండు విజయాలను అందుకున్న టీమ్ఇండియాకు తొలి పరాజయం ఎదురైంది. దక్షిణాఫ్రికా చేతిలో ఓడిపోయింది. దీంతో పాకిస్థాన్కు సెమీస్ అవకాశాలు గల్లంతయ్యాయి. ఆదివారం దక్షిణాఫ్రికాతో జరిగిన మ్యాచ్లో టీమ్ఇండియా 5 వికెట్ల తేడాతో ఓటమిపాలైంది. ఈ పరాజయంతో రోహిత్ సేనకు వచ్చే ఇబ్బంది పెద్దగా ఏం లేకున్నా.. పాకిస్థాన్ జట్టుకు మాత్రం తీవ్ర నష్టం జరిగింది. ఈ మ్యాచ్లో భారత్ గెలిచి ఉంటే.. పాకిస్థాన్కు సెమీస్ అవకాశాలు ఉండేవి. తదుపరి రెండు మ్యాచ్‌ల్లో మెరుగైన రన్ రేట్ సాధిస్తే ఆ జట్టు నాకౌట్ దశకు చేరేది. కానీ దక్షిణాఫ్రికా గెలవడం వల్ల పాక్కు ఛాన్స్ లేకుండా పోయింది. ఇక పాక్కు ఉన్న ఒకే ఒక అవకాశం.. భారత్ వరల్డ్ కప్ నుంచి వైదొలగడమే.
యాదృచ్ఛికం అంటే ఇేదే కాబోలు.. అందుకే గత వరల్డ్ కప్లో టీమ్ఇండియాకు పట్టిన గతే ఈసారి పాకిస్థాన్కు పట్టింది. దుబాయ్ వేదికగా భారత్ నిర్వహించిన ఆ టోర్నీలో విరాట్ కోహ్లీ సారథ్యంలోని టీమ్ లీగ్ దశలోనే టోర్నీ నుంచి ఇంటిముఖం పట్టింది. మొదటి మ్యాచ్లో ఓడిపోయిన భారత జట్టు.. రెండో మ్యాచ్లోనూ న్యూజిలాండ్ చేతులో ఓడి సెమీస్ అవకాశాలను గల్లంతు చేసుకుంది. అనంతరం న్యూజిలాండ్‌పై అఫ్గానిస్థాన్‌ గెలవాలని కోరుకున్నా.. అది జరగలేదు. తర్వాతి మ్యాచ్‌ల్లో అఫ్గాన్, నమీబియా, స్కాట్లాండ్‌ను ఓడించినా.. నాకౌట్‌కు చేరలేకపోయింది. అప్పుడు భారత గ్రూప్‌లో ఉన్న పాకిస్థాన్, న్యూజిలాండ్ సెమీస్ చేరాయి.
పాక్కు విపత్కర పరిస్థితి.. తాజాగా జరుగుతున్న ప్రపంచకప్‌లో పాకిస్థాన్ విపత్కర పరిస్థితి ఎదుర్కొంటుంది. తొలి మ్యాచ్లో భారత్ చేతిలో ఓడిన బాబర్ సేన.. రెండో మ్యాచ్లో జింబాబ్వే చేతిలో ఓడిపోయింది. మూడో మ్యాచ్లో నెదర్లాండ్స్‌పై గెలిచినా.. సౌతాఫ్రికా చేతిలో భారత్ ఓడిపోవడంతో ఆ జట్టు ఆశలు గల్లంతయ్యాయి. తదుపరి మ్యాచ్‌ల్లో సౌతాఫ్రికా, బంగ్లాదేశ్‌పై గెలిచినా పాక్ ముందడుగు వేయలేని పరిస్థితి నెలకొంది. గతేడాది భారత అభిమానులు లెక్కలేసుకున్నట్లే ఈ సారి పాక్ అభిమానులు సెమీస్ సమీకరణాలు పరిశీలిస్తున్నారు. మొత్తానికి రెండు దాయాదీ దేశాలకు ఒకే పరిస్థితి ఎదురవ్వడం గమ్మత్తైన విషయమని కామెంట్స్ చేస్తున్నారు.
భారత్కు సెమీస్ గండం.. గతేడాది గ్రూప్ టాపర్‌గా సెమీస్ చేరిన పాకిస్థాన్.. ఆస్ట్రేలియా చేతిలో ఓడిపోయింది. ఈ సారి భారత్ కూడా పాకిస్థాన్ తరహాలోనే సెమీస్‌లోనే వెనుదిరుగుతుందా? అనే ఫ్యాన్స్ సందేహం వ్యక్తం చేస్తున్నారు. నాకౌట్స్‌లో భారత్కు గండంలా తయారైన న్యూజిలాండ్‌తోనే భారత్ తలపడే అవకాశాలు కనిపిస్తున్నాయి.
పాక్కు సెమీస్ ఛాన్స్.. గ్రూప్-2లో మూడు మ్యాచ్‌ల్లో ఒక్క విజయం సాధించిన పాకిస్థాన్ 2 పాయింట్లతో ఐదో స్థానంలో కొనసాగుతోంది. రన్‌రేట్ కూడా మెరుగ్గా లేదు. ఈ పరిస్థితుల్లో పాకిస్థాన్ సెమీస్ చేరాలంటే.. తన చివరి రెండు మ్యాచ్‌ల్లో సౌతాఫ్రికా, బంగ్లాదేశ్‌లపై భారీ విజయాలు సాధించాలి. అంతే కాకుండా భారత్.. బంగ్లా చేతిలో ఓడి, జింబాబ్వేపై తక్కువ మార్జిన్‌తో గెలిస్తే... మెరుగైన నెట్ రన్ రేట్ ఆధారంగా పాక్ టాప్-2లో నిలిచే అవకాశం ఉంది. ఇప్పటికైతే పాక్ కంటే భారత్కు మెరుగైన నెట్ రన్‌రేట్ ఉంది. పాకిస్థాన్‌ను సౌతాఫ్రికా ఓడిస్తే చాలు.. దాయాది సెమీస్ రేసు నుంచి వైదొలిగినట్టే. ఈ నేపథ్యంలో నవంబర్ 3న దక్షిణాఫ్రికా, పాక్ మధ్య జరిగే మ్యాచ్ కీలకం కానుంది.
ఇదీ చదవండి: హోటల్ రూమ్ వీడియో లీక్.. విరాట్ కోహ్లీ, అనుష్క ఫుల్ సీరియస్
'రక్షిస్తారనుకుంటే ఇలా చేశారేంటి?'.. టీమ్ఇండియా ఆటపై షోయబ్ అక్తర్
