IPL 2022 Qualifier 2 RR Vs RCB: ఐపీఎల్ 15వ సీజన్ ఫైనల్లోకి అడుగుపెట్టింది రాజస్థాన్ రాయల్స్. తొలి క్వాలిఫైయర్లో గుజరాత్ చేతిలో ఓటమిపాలైన రాజస్థాన్.. శుక్రవారం ఆర్సీబీతో జరిగిన క్వాలిఫైయర్ 2 మ్యాచ్లో అదరగొట్టింది. బెంగళూరుపై 7 వికెట్ల తేడాతో ఘనవిజయం సాధించింది. ఆర్సీబీ నిర్దేశించిన 158 పరుగుల లక్ష్యాన్ని 18.1 ఓవర్లలో ఛేదించింది సంజూసేన. ఓపెనర్‌ జోస్ బట్లర్ (106*; 60 బంతుల్లో 10 ఫోర్లు, 6 సిక్స్‌లు) మరోసారి శతకంతో చెలరేగాడు. యశస్వీ జైస్వాల్ (21), సంజూ శాంసన్ (23) ఫర్వాలేదనిపించారు. బెంగళూరు బౌలర్లలో హేజిల్‌వుడ్ 2, హసరంగ ఒక వికెట్ పడగొట్టారు.
తప్పక గెలవాల్సిన మ్యాచ్లో టాస్ ఓడి తొలుత బ్యాటింగ్‌ చేసిన బెంగళూరు జట్టు మోస్తరు స్కోరుకే పరిమితమైంది. నిర్ణీత 20 ఓవర్లలో ఆ జట్టు 8 వికెట్ల నష్టానికి 157 పరుగులు చేసింది. బెంగళూరు ఆటగాళ్లలో రజత్ పాటిదార్‌ (58; 42 బంతుల్లో 4 ఫోర్లు, 3 సిక్స్‌లు) రాణించగా.. డుప్లెసిస్‌ (25), మ్యాక్స్‌వెల్ (24) ఫర్వాలేదనిపించారు. రాజస్థాన్ బౌలర్లలో ప్రసిద్ధ్‌ కృష్ణ, మెకాయ్ తలో మూడు వికెట్లు పడగొట్టగా.. అశ్విన్‌, ట్రెంట్ బౌల్ట్ చెరో వికెట్ తీశారు. అహ్మదాబాద్‌ వేదికగా మే 29న జరగబోయే ఫైనల్ మ్యాచ్లో గుజరాత్తో తలపడనుంది సంజూసేన.
బట్లర్ రికార్డులు: ఐపీఎల్ తొలి సీజన్లో టైటిల్ గెలిచిన రాజస్థాన్ను.. మరో సెంచరీతో రెండోసారి ఫైనల్కు చేర్చాడు బట్లర్. ఈ క్రమంలోనే పలు రికార్డులను తన ఖాతాలో వేసుకున్నాడు.
- ఈ సీజన్లో బట్లర్కు ఇది నాలుగో సెంచరీ. దీంతో ఒక ఐపీఎల్ సీజన్లో నాలుగు శతకాలతో కోహ్లీతో సమానంగా ఉన్నాడు బట్లర్. 2016లో కోహ్లీ కూడా 4 సెంచరీలు బాదాడు.
- ఐపీఎల్లో అత్యధిక శతకాలు (5) బాదిన వారిలో కోహ్లీతో సమానంగా రెండో స్థానంలో ఉన్నాడు బట్లర్. ఈ జాబితాలో యూనివర్సల్ బాస్ క్రిస్ గేల్ (6 సెంచరీలు) అగ్రస్థానంలో ఉన్నాడు.
- ఒక సీజన్లో అత్యధిక పరుగులు చేసినవారిలో 824 పరుగులతో మూడో స్థానంలో ఉన్నాడు బట్లర్. అతడి కన్నా ముందు కోహ్లీ (2016లో 973 పరుగులు), డేవిడ్ వార్నర్ (2016లో 848 పరుగులు) ఉన్నారు.
ఇవీ చదవండి: మేం ఫైనల్కు వెళ్లడం కష్టమే: ఆర్సీబీ కెప్టెన్
వావ్ పటిదార్‌.. 'బెంగళూరు' కోసం పెళ్లిని వాయిదా వేసుకున్నావా!
